AQSH prezidenti Donald Tramp o‘zining Ukraina va Rossiya masalalari bo‘yicha maxsus vakili, iste’fodagi general Kit Kellogga Rossiya—Ukraina urushini 100 kun ichida tugatishga erishishni topshirdi, deb yozadi The Wall Street Journal (WSJ).
Deyarli hech kim, ayniqsa rossiyaliklar, u buni qila oladi deb o‘ylamaydi, deydi xabar mualliflari.
Shu bilan birga, xabarda aytilishicha, kuzatuvchilar “Tramp Ukraina bo‘yicha muzokaralarni shaxsan nazorat qilish niyatida” deb hisoblaydi.
Kellog unga muzokaralar bo‘yicha maslahat beradi, ammo Trampning maslahatga muhtojligi aniq emas, deya qayd etadi WSJ.
Jurnalistlarning ta’kidlashicha, Rossiya prezidenti Vladimir Putin bilan kelishuv tuzish Tramp saylov kampaniyasi davomida Oq uyga qaytganidan keyin 24 soat ichida Ukrainadagi urushni tugatishga va’da berganida o‘ylaganidan ancha qiyin bo‘ladi.
Kellogning o‘zi Trampning inauguratsiyasidan oldinroq Fox News telekanali efirida Ukrainadagi harbiy mojaroni 100 kun ichida hal qilish uchun yechim topishni xohlashini aytgandi. Biroq o‘sha paytlardayoq ekspertlar bunday intilishni noreal deb atashgan.
Ukrainadagi urushni tugatish uchun Kellog rejasi
2024-yilning aprel oyida Kit Kellog Tramp tarafdori bo‘lgan “Amerika hamma narsadan ustun” siyosat instituti (AFPI) tomonidan ishlab chiqilgan Ukrainadagi urushni tugatish rejasining hammuallifi bo‘ldi. Uning maqsadi Ukraina va Rossiyani turli ta’sir vositalaridan foydalangan holda imkon qadar tezroq tinchlik muzokaralarini boshlashga undashdir.
Xususan, rejaga ko‘ra, agar Ukraina muzokaralarda ishtirok etmasa, AQSH harbiy yordamini butunlay qisqartirish xavfi ostida qoladi. Rossiya esa kelishuvga kirishni istamasa, Vashington tomonidan Kiyevni qo‘llab-quvvatlash sezilarli darajada kuchaytiriladi.
O‘tgan yilning dekabr oyida o‘tkazilgan Kiyev xalqaro sotsiologiya instituti (KXSI) so‘roviga ko‘ra, Ukraina aholisining 45 foizi Trampning g‘alabasi o‘t ochishni to‘xtatishni “biroz” yoki “sezilarli darajada” yaqinlashtiradi deb hisoblaydi. Ukrainaliklarning atigi 14 foizigina AQSHdagi saylovlarning natijasi sulhni uzoqlashtirishiga ishonch bildirgan.
Izoh (0)