AQSH prezidenti Donald Tramp Eron tomonidan qo‘llab-quvvatlanayotgan Yaman husiylarini “xorijiy terrorchi tashkilot” sifatida belgilovchi farmonni imzoladi.
Sobiq prezident Jo Bayden 2021-yilda Tramp o‘rniga kelgach, uning o‘z muddati yakunida kiritgan ushbu ta’rifni bekor qilgan edi.
Baydenning bu qarori insonparvarlik tashkilotlarining tashvishi tufayli qabul qilingan. Ular amalda katta hududlarni, jumladan poytaxt Sanoni nazorat qilayotgan husiylar bilan muloqot qilishga majbur bo‘lganlari sababli, Yamanni tark etishlariga to‘g‘ri kelishini bildirgan.
Biroq 2023-yil 7-oktyabrda G‘azoda urush boshlanganidan bir necha hafta o‘tib, husiylar Qizil dengiz va Adan ko‘rfazidagi kemalarga hujumlar uyushtirishni boshladi. Ular bu harakatlari bilan falastinliklarni qo‘llab-quvvatlayotganini ta’kidlashdi.
Shuningdek, ular AQSH va Buyuk Britaniyaga tegishli kemalarni “qonuniy nishonlar” deb e’lon qilishdi.
Bunga javoban Bayden ma’muriyati 2024-yilda rasman “Ansor Alloh” nomi bilan tanilgan husiylarni yana “maxsus belgilangan global terrorchi tashkilotlar” ro‘yxatiga kiritdi.
Bu unchalik qat’iy bo‘lmagan tasnif urush vayron qilgan mamlakatga insonparvarlik yordamini yuborish imkonini berardi.
Trampning 22-yanvar kungi qarori xorijiy terrorchi tashkilotning yanada qat’iyroq maqomini tiklashga qaratilgan, deyiladi xabarda.
Trampning ijroiya farmonida aytilishicha, husiylar “fuqarolik infratuzilmasiga, jumladan, Saudiya Arabistonidagi fuqaro aeroportlariga bir necha marta hujum qilgan”, shuningdek “2023-yil oktyabr oyidan beri Isroilga 300 dan ortiq snaryad otgan”.
Ushbu farmon bir necha haftadan so‘ng kuchga kirishi mumkin.
Izoh (0)