Yevropa ittifoqining tashqi ishlar va xavfsizlik siyosati bo‘yicha oliy vakili Kaya Kallas 2028-yilga kelib Rossiya YI davlatlaridan biriga qarshi harbiy tajovuzni boshlashi mumkinligi haqida ogohlantirdi.
“Milliy razvedka xizmatlarimizning ko‘pchiligi bizga Rossiya 3-5 yil ichida mudofaa tayyorgarligimizni sinab ko‘rishi mumkinligi to‘g‘risida ma’lumot bermoqda”, dedi Kallas Bryusselda o‘tkazilgan Yevropa mudofaa agentligining (EDA) yillik anjumanida so‘zga chiqib.
U Kremlning ehtimoliy tajovuz rejalari tafsilotlarini oshkor qilmadi. Shu bilan birga, Kallas “Ukraina Rossiya bosqiniga qarshi kurashayotgani tufayli” Yevropa vaqtdan yutayotganini ta’kidladi. Uning so‘zlariga ko‘ra, YIning eng muhim vazifasi Kiyevga harbiy yordam ko‘rsatishni davom ettirishdir.
“Ukrainaga ko‘proq yordam bera olishimizga shubha yo‘q. Bizning yordamimiz bilan u urushda g‘alaba qozonishi mumkin”, deya ishonch bildirdi u.
Kallas mudofaa xarajatlarini oshirishga chaqirdi
YI diplomatiyasi rahbari ittifoq mamlakatlarini mudofaa sohasiga investitsiyalarni ko‘paytirishga, shu bilan birga nafaqat urushning oldini olish, balki unga tayyorgarlik ko‘rish uchun ham mablag‘ sarflashga chaqirdi.
Donald Tramp yevropaliklarning mudofaa xarajatlari yetarli emas, deya haq gapni aytgan, deya ta’kidladi u.
Kallasning so‘zlariga ko‘ra, hozir Moskva harbiy maqsadlarga Bryusselga qaraganda deyarli besh baravar ko‘p byudjet mablag‘larini sarflamoqda: 2024-yilda YI mamlakatlarining mudofaa xarajatlari yalpi ichki mahsulotning o‘rtacha 1,9 foizini tashkil etgan bo‘lsa, Rossiyada bu ko‘rsatkich 9 foizni tashkil etgan.
“Putin faqat kuchni tushunadi”
“Yevropaning o‘z harbiy salohiyatiga sarmoya kiritishga qodir emasligi ham bosqinchiga xavfli signal yubormoqda”, deya qo‘shimcha qildi Kallas.
Uning so‘zlariga ko‘ra, Rossiya prezidenti Vladimir Putin “faqat kuch tilida gaplashadi”, “zaiflik esa uni gij-gijlaydi”.
Siyosatchi hozirda Rossiyaga qarshi sanksiyalarning 16-paketi ustida ish olib borilayotganini ma’lum qildi. Ukrainani qo‘llab-quvvatlash haqida so‘z yuritarkan, Kallas Yevropa Ittifoqining ushbu mamlakatga harbiy yordami hozirda deyarli 50 milliard yevroga yetganini qayd etdi. Bundan tashqari, joriy yilning fevral oyi oxirigacha Yevropa ittifoqi mamlakatlarida jami 75 ming ukrainalik askar va zobit harbiy tayyorgarlikdan o‘tadi.
Izoh (0)