AQSH davlat kotibi Entoni Blinken Ukraina tashqi ishlar vaziri Andrey Sibiga bilan telefon orqali muloqot qildi. Bu haqda Davlat departamenti rasmiysi Metyu Miller bayonotida aytilgan.
Blinken Vashingtonning Kiyevga yordami davom etishini qayd etdi. Uning ta’kidlashicha, bu ayniqsa qish boshlanishidan oldin muhimdir. U, shuningdek, Ukrainaga zarur qurol-yarog‘ haqida ham gapirgan.
“Davlat kotibi AQSHning Ukrainani barqaror qo‘llab-quvvatlash bo‘yicha maqsadlarini belgilab berdi”, deyiladi bayonotda.
Blinken, shuningdek, Amerika rasmiylarining “Ukrainada suverenitet va demokratiyani qo‘llab-quvvatlash”, BMT nizomi tamoyillari asosida mojaro hududida tinchlik o‘rnatish majburiyatini tilga olgan.
Kecha 29-noyabr kuni CNN telekanali Donald Trampning Ukraina bo‘yicha tinchlik rejasi tafsilotlari ma’lum bo‘lganini xabar bergandi.
Unga ko‘ra, Tramp yaqinda Ukraina bo‘yicha maxsus elchi etib tayinlagan Kit Kellogning takliflari Tramp ma‘muriyati amalga oshirishga harakat qiladigan reja bo‘lishi mumkinligi qayd etilgan.
Rejaning mohiyati tezda sulhga erishish va front chizig‘ini muzlatish, shundan so‘ng har ikki tomonning muzokaralar stoliga o‘tirishidan iborat. Ammo bundan keyin ishlar yanada murakkablashishi mumkin, deb yozadi CNN.
Izoh (0)