Donald Trampning AQSH hokimiyatiga kelishi munosabati bilan Amazon kompaniyasi irqiy, gender tenglik va inklyuzivlikni ta’minlovchi “DEI” dasturidan voz kechishga qaror qildi.
Amazon o‘zining ommabop veb-saytlaridan ishchilarni himoya qilishga qaratilgan bir qator siyosatlarni, jumladan, qora tanli xodimlar bilan birdamlik va’dalarini va transgender xodimlar uchun tibbiy yordam imtiyozlarini shov-shuvsiz olib tashladi, deyiladi The Washington Post xabarida.
Qayd etilishicha, Amazon ushbu dasturlarni “eskirgan va siyosiy voqelikka mos kelmaydigan” deb tan olgan.
Nashr ma’lumotlariga ko‘ra, sahifalar taxminan bir oy oldin o‘chirilgan. O‘zgarishlar bir nechta siyosatlarga, shuningdek, bo‘limlarning nomlariga ham ta’sir ko‘rsatgan. Ilgari “Xilma-xillik, tenglik va inklyuzivlik” deb nomlangan bo‘lim endi “Inklyuziv tajriba va texnologiyalar” deb atalmoqda, “DEI ni texnologiyalar orqali rivojlantirish” bo‘limi esa endi “xodimlar tajribasini takomillashtirish” va’dasiga aylangan.
Alohida guruhlar uchun dasturlar yaratish o‘rniga, biz tasdiqlangan natijalarga ega dasturlarga e’tibor qaratamiz va biz ham korporativ madaniyatimizni rivojlantirishga intilamiz, deyiladi kompaniya ichki hujjatida.
Joriy yilning 20-yanvaridan prezidentlik lavozimiga kirishgan Tramp AQSH siyosatidagi muhim o‘zgarishlar haqida gapirar ekan, turli genderlarni ijtimoiylashtirish, ularni odamlar hayotiga tiqishtirishdan voz kechishini ta’kidlab o‘tgandi.
Shu hafta jamoatchilik va shaxsiy hayotning har jabhasiga turli genderlarni tiqishtirishga urinishdan iborat bo‘lgan davlat siyosatiga chek qo‘yaman. Biz rang-baranglarni yoqtirmaydigan va qadr-qimmatga asoslangan jamiyatni yaratamiz. Bugundan boshlab AQSH hukumatining rasmiy siyosati faqat ikki jins — erkak va ayol jinsi bor deb tan olishdan iborat bo‘ladi, dedi AQSH prezidenti.
Avvalroq AQSh Kongressi Vakillar palatasi spikeri Maykl Jonson Oq uyda qilgan chiqishida AQSH bundan buyon o‘z siyosatida faqat ikki jinslilik tamoyili asosida harakat qilishini ma’lum qilgandi.
Erkaklar hech qachon ayolga aylana olmaydi. Bu haqda gapirishga majbur bo‘layotganimiz achinarli. Bu biologiya masalasi. Biz yaratilishdan erkak yoki ayol qilib yaratilganmiz. Agar biz buni tan olmasak yoki buni rad etishga harakat qilsak, o‘zimiz xavf ostida qolamiz, qizlarimizga esa zarar keltiramiz, dedi u.
Jo Bayden boshqaruvi paytida siyosatchilarning bunday chiqishlarini uchratish amrimahol bo‘lgan.
Izoh (0)