13 йилдан сўнг Сурияга биринчи парвозини амалга оширган Turkish Airlines (ТHY) самолёти Дамашқ халқаро аэропортига қўнди, деб хабар бермоқда Anadolu.
Turkish Airlines авиакомпаниясининг Boeing 777 самолёти Истанбул аэропортидан йўлга чиқди. Дамашқ халқаро аэропорти эса Суриядаги Асад режими ағдарилганидан сўнг ўз фаолиятини қайта бошлади.
“Сурия ҳаво йўллари” самолёти 18 декабрь куни Дамашқ халқаро аэропортидан Ҳалабга ички авиақатновда илк парвозини амалга оширди.
Жорий йилнинг 7 январь куни Дамашқ аэропорти халқаро рейсларни қайта тиклаган эди.
ТHY’нинг Сурияга охирги парвози 2012 йил 31 мартда амалга оширилган эди.
Парвозлар ҳафтасига 3 марта амалга оширилиши режалаштирилмоқда. ТHY сайтидан олинган маълумотларга кўра, Истанбул аэропортидан Дамашқ халқаро аэропортига тўғридан-тўғри рейслар ҳафтасига уч марта: сешанба, пайшанба ва якшанба кунлари соат 09:00 да амалга оширилади. Дамашқ аэропортидан Истанбул аэропортига қайтиш рейслари ҳам худди шу кунлари соат 13:00 га режалаштирилган.
Суриянинг янги ҳукумати аввалроқ Туркия товарлари импортига божларни 300-500 фоизга оширган эди.
Бунинг оқибатида Туркиядан араб республикасига экспорт деярли тўхтади, бу эса соҳада фаолият юритаётган компаниялар учун жиддий муаммоларни келтириб чиқарди. Шунингдек, чегарада турнақатор навбатларга олиб келди.
Жануби-Шарқий Anadolu экспортчилари уюшмаси раиси Жалол Кадоглуга кўра, илгари Сурияга ойлик экспорт ҳажми тахминан 30 миллион долларни ташкил этган. Аммо ҳозирда бу бутунлай тўхтаб қолган.
“Вазият, айниқса, Сурияга товар етказиб беришга ихтисослашган компаниялар учун оғриқли, чунки улар ўз маҳсулотларини қисқа вақт ичида бошқа бозорларга йўналтира олмайди”, деди у.
Туркиялик шарҳловчиларнинг ёзишича, муаммо аллақачон сиёсий кун тартибига қўйилган. Туркия ташқи ишлар вазири Ҳоқон Фидан Сурия муваққат ҳукумати вакиллари билан учрашувда бож масаласини муҳокама қилиши кутилганди.
Энди кўплаб экспортчилар савдони тиклаш ва зарарни минималлаштириш учун муаммонинг тезда ҳал қилинишини кутмоқда. Бу Туркия ва Сурия ўртасида иқтисодий муносабатлардаги қийинчиликларни кўрсатмоқда.
Аввалроқ Туркия президенти Ражаб Тоййиб Эрдўғон мамлакатининг Сурия инқирозига аралашуви нафақат ўзини оқлаган, балки зарурий қадам эканини таъкидлаганди.
Изоҳ (0)