Isroil Mudofaa armiyasi bosh shtabi boshlig‘i Gersi Xalevi 6-martdan iste’foga chiqish niyatini mudofaa vaziri Isroil Katsga ma’lum qildi, deb yozmoqda The Times of Israel.
Xalevi 2023-yil 7-oktyabrda HAMAS Isroil chegarasini kesib o‘tganida mamlakat harbiylarining “muvaffaqiyatsizligi” uchun javobgarlikni tan oldi. Bosh shtab boshlig‘ining aytishicha, u 6-martgacha HAMAS hujumini tekshirishni yakunlash va Isroil armiyasini “kelajakdagi vazifalar”ga tayyorlash niyatini bildirgan.
Tergov natijalari bo‘yicha hisobot taqdim etiladi. Xalevi qo‘mondonlikni o‘z izdoshiga topshirishini ham qo‘shimcha qildi. The Jerusalem Post aniqlik kiritishicha, Xalevi lavozimda ikki yil-u ikki oy faoliyat yuritganidan so‘ng, vazifasini tark etmoqda. Nashr, shuningdek, Xalevining oktyabr oyidayoq muvaffaqiyatsiz mudofaa uchun javobgarlikni o‘z zimmasiga olishga va’da berganini eslatdi.
Joriy yilning 20-yanvar kuni Isroil armiyasi rahbari G‘azo va Livanda yangi operatsiyalar rejalarini tayyorlashni buyurdi. Xalevi, shuningdek, yaqin kunlarda Iordan daryosining G‘arbiy qirg‘og‘ida aksilterror operatsiyalariga tayyorgarlik ko‘rishga chaqirdi. Uning aytishicha, ularning maqsadi terrorchilarni Isroil tinch aholisiga yetib bormasidan oldin qo‘lga olishdan iborat.
Avvalroq Isroilning uch nafar vaziri HAMAS bilan erishilgan kelishuvga norozilik sifatida iste’foga chiqqan edi.
Milliy xavfsizlik vaziri Itamar Ben-Gvir o‘t ochishni to‘xtatish bitimi tuzilgandan so‘ng iste’foga chiqqanini aytdi. U rahbarlik qilayotgan o‘ta o‘ng qanot “Otzma Yexudit” partiyasi tegishli bayonot berdi.
Ben-Gvir Isroil bosh vaziri Binyamin Netanyaxuni “barcha mafkuraviy qizil chiziqlarni kesib o‘tganlikda” aybladi. Vazir HAMAS bilan kelishuvni “terrorizmning to‘liq g‘alabasi” deb atadi.
Shuningdek, Ben-Gvirning hamkasblari — meros vaziri Amixay Eliyagu va milliy barqarorlik bo‘yicha vazir Isxak Vasserlauf iste’foga chiqdi.
“Otzma Yexudit” hukmron koalitsiyadan chiqqanini e’lon qildi. Partiya agar Isroilning HAMASga qarshi harbiy harakatlari qayta tiklansa va to‘liq g‘alaba qozonilgunga qadar davom etsa, ortga qaytishga tayyorligini bildirdi.
Bitimni hukumatning yana bir a’zosi — moliya vaziri va “Diniy sionizm” partiyasi yetakchisi Betsalel Smotrich tanqid qildi. Netanyaxu ikkala vazir bilan ham uchrashdi. Shundan keyin Smotrich hukumat tarkibidan chiqmaslikka va’da berdi.
Izoh (0)