Buyuk Britaniya Ukrainada harbiy bazalar va mudofaa infratuzilmasini joylashtirish masalasini o‘rganadi. Bu ikki davlat o‘rtasidagi 100 yillik sheriklik to‘g‘risidagi deklaratsiya yozilgan bo‘lib, uning matni Britaniya hukumati tomonidan e’lon qilindi.
“Kelishuv ishtirokchilari Ukrainada mudofaa infratuzilmasini, jumladan harbiy bazalar, moddiy-texnik ta’minot omborlari, harbiy texnika va qurol-yarog‘ zaxira omborlarini joylashtirish hamda qo‘llab-quvvatlash variantlarini ko‘rib chiqadilar. Jiddiy harbiy tahdid yuzaga kelgan taqdirda, bu inshootlar o‘z mudofaa qobiliyatini kuchaytirish uchun foydalanilishi mumkin”, deyiladi hujjatda.
Britaniya 2030-2031-yillargacha Kiyevga har yili kamida 3 milliard dollar va “Ukrainani qo‘llab-quvvatlash uchun zarur bo‘lgan barcha” harbiy yordamni ko‘rsatishi lozim. Uzoq masofaga zarba beruvchi vositalar, havo hujumi va raketalarga qarshi mudofaa tizimlari, murakkab qurol-aslahalar zaxiralari bo‘yicha hamkorlikni chuqurlashtirish rejalashtirilgan.
100 yillik sheriklik shartnomasi
Ukraina va Buyuk Britaniya o‘rtasidagi hamkorlik shartnomasi 16-yanvar kuni Britaniya bosh vaziri Kir Starmerning Kiyevga tashrifi paytida imzolandi. Ukraina prezidenti Vladimir Zelenskiy hujjatning yopiq qismi mavjudligini ma’lum qildi.
“Bitimda iqtisodiy, texnologik va ta’lim sohasidagi hamkorlik, jumladan maktablarimiz va universitetlarimizni Britaniya bilan birgalikda rivojlantirish ko‘zda tutilgan. Shuningdek, bitimning yopiq, maxfiy qismi ham bor”, degan edi Zelenskiy.
Prezidenti bu barqarorlik va rivojlanish imkoniyatlarini oshiradigan narsalar ekaniga to‘xtalgan. Kiyevga tashrifi davomida Starmer Ukrainaga yangi artilleriya va Grateful nomli mobil havo mudofaa tizimi berilishini aytgan.
Izoh (0)