Rossiya Ukrainaga qarshi urushda qatnashish uchun xorijiy fuqarolarni harbiy xizmatga jalb etishda davom etmoqda. Bu haqda Buyuk Britaniya Mudofaa vazirligi X ijtimoiy tarmog‘idagi sahifasida ma’lum qildi.
Xabarga ko‘ra, xorijliklar 2200 dollar oylik maosh, bir martalik 2000 dollar to‘lov, Rossiya pasporti, bepul tibbiy xizmat evaziga mamlakat armiyasining “maxsus bo‘linmalari” safiga taklif qilinmoqda.
London bunday reklama professional askarlar uchun emas, balki avvalroq aldanib, Rossiya armiyasiga qo‘shilgan muhojirlarga qaratilganiga ishonch bildirgan.
Kuniga o‘rtacha 913 nafar askar yo‘qotishlarni hisobga olgan holda, Rossiya o‘z armiyasi sonini oshirish uchun yangi imkoniyatlarni o‘rganmoqda, — deya ta’kidlagan vazirlik.
Britaniya razvedkasi maʼlumotlariga ko‘ra, 2023-yil o‘rtalarida Internetning Rossiya segmentida Markaziy Osiyo davlatlaridan mehnat muhojirlarini yollash bo‘yicha eʼlonlarda oylik maosh taklifi 1973 dollar va to‘lovlar 5140 dollarni tashkil qilgan.
Markaziy Osiyoning barcha mamlakatlarida, istisnosiz, chet davlat armiyasida xizmat qilish jinoyat hisoblanadi. Shu bois Rossiya Mudofaa vazirligi bilan shartnoma imzolashga rozi bo‘lgan muhojirlar vataniga qaytgan taqdirda, jinoiy javobgarlikka tortiladi. Ushbu modda bo‘yicha qamoq jazosi Tojikistonda 5 yildan 12 yilgacha, O‘zbekistonda 5 yildan 10 yilgacha, Qirg‘izistonda 10 yildan 12 yilgacha bo‘lgan muddatni tashkil etadi.
Izoh (0)