Abduqodir Husanov 50 mln yevro evaziga “Lans”dan “Manchester Siti”ga o‘tsa “Bunyodkor” 2 foiz haq oladi. Bu haqda jurnalist Nodirxo‘ja Yo‘ldoshev ma’lum qildi.
Uning yozishicha, FIFA reglamentiga ko‘ra, 12-15 yoshgacha 0.25 foizdan jami 4 mavsumga 1 foiz va 16-17 yosh uchun 0.50 foizdan 1 foiz berilishi belgilangan.
Transfer summasidan 2 foiz 1 mln yevroni (14,3 mlrd so‘m) tashkil etadi.
Avvalroq Husanov va “Man Siti” o‘rtasidagi kelishuv 2030-yilning yoziga qadar tuzilishi xabar qilingandi. Klub “Lans”ga 50 mln to‘lab berishga tayyor.
Shuningdek, “Manchester Siti” Abduqodir Husanov transferi borasida “Lans”ga rasmiy taklif yuborgani haqida xabar berilgandi.
Husanov Buyuk Britaniya vizasiga ariza topshirgani haqida ma’lumot berilgan edi.
Husanov Angliyaning “Chelsi” va “Nyukasl” klublari, Ispaniyaning “Real”, shuningdek, Fransiyaning “PSJ” jamoasi qiziqishlari doirasida ekani xabar qilingandi. Agentlar Parij variantini o‘yin amaliyoti kafolati yo‘qligi sababli rad etgan.
Klub direktori futbolchining yanvarda jamoani tark etishi mumkinligi, ammo hali rasmiy takliflar bo‘lmagani haqida ma’lum qilgandi.
Husanov 2023-yilda Belarusning “Energetik-BGU” klubida o‘ynagan va shu yilning iyul oyida 100 ming yevro evaziga “Lans”ga transfer bo‘lgandi.
Husanov Fransiya klubi safida 31 ta o‘yinda maydonga tushib, bir marta golli uzatma amalga oshirdi. Uning fransuz klubi bilan tuzgan shartnomasi 2027-yilning iyuniga qadar amal qiladi.
Transfermarkt ma’lumotiga ko‘ra, uning bozor qiymati 12 million yevroga baholangan.
Izoh (0)