Taniqli futbol insayderi Fabritsio Romano “Manchester Siti” Abduqodir Husanov bo‘yicha tvit qoldirdi.
Uning yozishicha, manchesterliklar 2024-yilning dekabridan boshlab Husanov transfer masalasida ishni boshlagan. Gvardiola ham futbolchi bilan shartnoma tuzilishini maʼqulladi.
“Here we go, coming soon”, — deya qo‘shimcha qilgan Romano.
Yana bir insayder Sebastian Denisga ko‘ra, Husanov va “Man Siti” o‘rtasidagi kelishuv 2030-yilning yoziga qadar tuziladi. Klub “Lans”ga 50 mln to‘lab berishga tayyor.
Avvalroq “Manchester Siti” Abduqodir Husanov transferi borasida “Lans”ga rasmiy taklif yuborgani haqida xabar berilgandi.
Husanov Buyuk Britaniya vizasiga ariza topshirgani haqida ma’lumot berilgan edi.
Husanov Angliyaning “Chelsi” va “Nyukasl” klublari, Ispaniyaning “Real”, shuningdek, Fransiyaning “PSJ” jamoasi qiziqishlari doirasida ekani xabar qilingandi. Agentlar Parij variantini o‘yin amaliyoti kafolati yo‘qligi sababli rad etgan.
Klub direktori futbolchining yanvarda jamoani tark etishi mumkinligi, ammo hali rasmiy takliflar bo‘lmagani haqida ma’lum qilgandi.
Husanov 2023-yilda Belarusning “Energetik-BGU” klubida o‘ynagan va shu yilning iyul oyida 100 ming yevro evaziga “Lans”ga transfer bo‘lgandi.
Husanov Fransiya klubi safida 31 ta o‘yinda maydonga tushib, bir marta golli uzatma amalga oshirdi. Uning fransuz klubi bilan tuzgan shartnomasi 2027-yilning iyuniga qadar amal qiladi.
Transfermarkt ma’lumotiga ko‘ra, uning bozor qiymati 12 million yevroga baholangan.
Izoh (0)