Fransiya Ukraina hududiga o‘z qo‘shinlarini kiritishga tayyorgarlik ko‘rish doirasida maxfiy harbiy mashg‘ulotlar o‘tkazdi. Bu haqda Intelligence Online xabar berdi.
“Persey” nomi ostidagi mashg‘ulotlar kuzda 10 kun davomida bo‘lib o‘tgan. Unda Quruqlikdagi qo‘shinlarning maxsus operatsiyalar bo‘linmalari (CAST) ishtirok etgan. 3200 nafar fransuz harbiylari Kiyev shimolidagi Dnepr daryosi qirg‘og‘iga o‘xshagan hududda mashg‘ulot o‘tkazgan. Ularning taktikasi 2022-yil fevral oyida Rossiya hujumini to‘xtatishga muvaffaq bo‘lgan Ukraina qurolli kuchlari tajribasiga asoslangan.
Qo‘mondonlik dronlardan foydalanishga, radioelektron kurash va razvedka bo‘yicha mashg‘ulotlarga e’tibor qaratgan. Biroq ba’zi ishtirokchilar FPV-dronlarining yo‘qligidan norozi bo‘lib, fransuz ishlab chiqaruvchilarining orqada qolayotganini ta’kidlagan.
13-yanvar kuni Ukraina prezidenti Vladimir Zelenskiy fransuz hamkasbi Emmanuel Makron bilan xafsizlik kafolati sifatida G‘arb harbiylarini joylashtirishni muhokama qildi. Zelenskiy bu qadam Rossiyani tinchlikka majburlash uchun samarali vosita bo‘lishini aytdi.
Yevropa ittifoqi Ukrainaga 100 minggacha harbiy yubormoqchi
Yevropa davlatlari o‘t ochish to‘xtatilganidan keyin Ukrainaga 100 minggacha qo‘shin yuborishni muhokama qilmoqda. Bunda asosiy kuchlarni Fransiya, Germaniya, Italiya, Polsha va Buyuk Britaniya harbiylari tashkil etishi ehtimoli yuqori. Yevropa kontingentini Ukrainaga yuborish bo‘yicha muzokaralar dastlabki bosqichda. Ammo mamlakatlar o‘rtasida allaqachon kelishmovchiliklar mavjud.
Ayrim Yevropa rahbarlari bu Rossiya prezidenti Vladimir Putinda muzokaralar vaqti kelgani va u jang maydonidagi pozitsiyasini saqlab qolishi mumkinligi haqida taassurot uyg‘otishni xohlamaydi. Parda ortida ba’zi amaldorlar Yevropa ittifoqi Ukrainaga bera oladigan ehtimoliy kafolatlarni ham ko‘rib chiqmoqda.
Izoh (0)