Chexiya Slovakiya bilan ikki davlat vazirlar mahkamalarining navbatdagi qo‘shma yig‘ilishini Rossiya va Ukrainaga nisbatan munosabatlaridagi kelishmovchiliklar tufayli bekor qildi. Bu haqda BBC xabar berdi.
Ma’lum qilinishicha, bunday uchrashuvlar muntazam ravishda o‘tkazib turiladi va uning bekor qilinishi o‘ta yaqin munosabatlarga ega bo‘lgan ikki davlat uchun juda noodatiy holdir. Mojaro Slovakiya tashqi ishlar vaziri Yuray Blanarning Antaliyadagi diplomatik sammit doirasida Rossiya tashqi ishlar vaziri Sergey Lavrov bilan uchrashganidan keyin yuzaga kelgan.
Slovakiya qo‘shnisi tomonidan ushbu muzokaralar sababli qattiq tanqid ostiga olingan. Slovakiya bosh vaziri Robert Fiko mamlakat erkin tashqi siyosat olib boruvchi va “dunyoning to‘rt burchagi bilan” o‘zaro aloqada bo‘lgan suveren davlat ekanini aytgan.
Chexiya va Slovakiyaning Rossiyaga nisbatan siyosati hamda Ukrainani qo‘llab-quvvatlashi hozir deyarli diametral qarama-qarshidir, — deydi Kemeron.
Slovakiya bosh vaziri Robert Fiko yaqinda Rossiyaga hamdardligini yana bir bor ta’kidladi va urush “Ukraina neonatsistlarining tajovuzlari” tufayli 2014-yilda boshlanganini aytdi. Uning fikricha, bu konfliktning harbiy yechimi yo‘q va vaziyatni tinch yo‘l bilan hal qilish yo‘llarini izlash zarur.
Chexiya uchun Ukrainadagi urushni tinch yo‘l bilan tartibga solish Rossiya qo‘shinlarining u yerdan to‘liq olib chiqilishini anglatadi. Chexiya Ukraina uchun zudlik bilan 800 ming snaryad sotib olish tashabbusi bilan chiqmoqda va doimiy ravishda Ukrainani barcha zarur qurollar bilan ta’minlashga chaqirmoqda. Chexiya Buyuk Britaniya va Polshadan oldin Ukrainaga tanklar yetkazib bergan birinchi davlat edi.
O‘z navbatida, Yevropaning yetakchi o‘q-dori ishlab chiqaruvchi Chexoslovak Group Ukrainada qo‘shma korxonalar tashkil etish rejasini e’lon qildi. Kompaniyaning milliarder egasi Mixal Strnad Ukraina mudofaa qobiliyatini mustahkamlash uchun artilleriya o‘q-dorilarini ishlab chiqarishga urg‘u berilishini aytdi.
Izoh (0)