Fransiyada zarba berish radiusi 1000 kilometrgacha bo‘lgan o‘rta masofali ballistik raketa ishlab chiqish imkoniyati ko‘rib chiqilmoqda. Loyiha Fransiya Qurolli kuchlari qo‘mondonligi va bosh boshqarmasi o‘rtasida muhokama qilinmoqda.
Tashabbus Ukrainadagi urush paytida Rossiya tomonidan qo‘llanilgan ballistik raketalarning samaradorligini tahlil qilishga asoslanadi. Rossiya 21-noyabr kuni o‘zining “Oreshnik” ballistik raketasi bilan Dneprga zarba bergandi, yuqori tezligi tufayli uni tutib olish deyarli imkonsiz.
Ukrainaning harbiy texnika va qurol-yarog‘larga ixtisoslashgan Defense Express konsalting kompaniyasi hisob-kitoblariga ko‘ra, 1000 kilometrlik masofa Boltiqbo‘yi davlatlaridan uchirilganda raketalarga Moskva va Nijniy Novgoroddagi nishonlarni urishga imkon beradi. Bunday uzoqlikdagi raketa ehtimol ixcham bo‘ladi, bu uni ishlab chiqish xarajatlarini kamaytirish va sezilarli miqdorda ishlab chiqarish imkonini beradi.
Ballistik raketaga bo‘lgan ehtiyoj
Fransiyada ballistik raketani ishlab chiqish Yevropa davlatlarining raketa qurollari bo‘yicha umumiy faolligi fonida muhokama qilinmoqda. 2024-yil iyul oyida Fransiya, Germaniya, Italiya va Polsha 1000 dan 2000 kilometrgacha masofaga uchadigan yangi ELSA qanotli raketasini yaratish loyihasini boshladi. Keyinchalik Buyuk Britaniya va Shvetsiya loyihaga qo‘shildi.
AQSH qurollari bilan Rossiyaga zarba berish
17-noyabr kuni AQSH prezidenti Jo Bayden Ukrainaga AQSH tomonidan yetkazib berilgan uzoq masofali ATACMS raketalaridan Rossiya hududiga zarba berish uchun foydalanishga ruxsat berdi. Bunga Shimoliy Koreya harbiylarining Rossiya armiyasi safida urushda qatnashayotgani turtki bo‘ldi.
19-noyabr kuni Ukraina armiyasi Rossiya hududiga AQSHning uzoq masofaga uchuvchi ATACMS raketalari bilan zarba berdi. Hujum Bryansk viloyati Karachev shahridagi harbiy obyektga qaratilgan. ATACMS’ning maksimal uchish masofasi 300 kilometrni tashkil qiladi.
21-noyabr kuni Rossiya ilk bor Ukrainaning Dnepr shahri bo‘ylab qit’alararo ballistik raketa uchirdi. Hujum Astraxan viloyatidagi poligondan amalga oshirilgan. Qit’alararo ballistik raketa besh ming kilometr masofani bosib o‘tishi mumkin, ammo ularning ba’zilari to‘qqiz ming kilometrdan ortiq masofaga mo‘ljallangan.
Ukraina Fransiya raketalari bilan Rossiyaga hujum qila oladi
Fransiya tashqi ishlar vaziri Jan-Noel Barro Ukraina SCALP (Storm Shadow raketalarining fransuzcha nomi) raketalaridan Rossiya nishonlariga hujum qilish uchun foydalanish huquqiga egaligini aytdi. U G‘arb Kiyevni qo‘llab-quvvatlash uchun “qizil chiziqlar” o‘rnatmasligi kerakligini ta’kidladi. Shuningdek, u Fransiya qo‘shinlarini Ukrainaga yuborish imkoniyatini ham istisno qilmadi.
Izoh (0)