Ijtimoiy tarmoqlarda “1000KITOB” loyihasi haqida turli fikrlar yangramoqda. Loyihaning Telegram-kanalida ish jarayoni bir maromda davom etayotgani ma’lum qilindi.
Qayd etilishicha, loyiha doirasida tanlangan 50 ta kitobdan barchasining tarjimasi tayyor. Kitoblar bo‘yicha ekspertlar xulosasi olingan. Jami 26 ta kitob tahrir qilingan, shu bilan birga, 19 ta kitob sahifalangan.
“Hozirda kitoblarni chop etish uchun tender talablari ishlab chiqilgan. Kitoblar nashriyotlardan to‘liq tayyor holda qabul qilib olingach, Yoshlar ishlari agentligi tomonidan bosma uchun ochiq tenderga qo‘yiladi”, deyiladi xabarda.
Shuningdek, loyihada kimlar ishlayotgani xususida ham axborot berildi.
Ma’lum qilinishicha, Yoshlar ishlari agentligi hamda AOKAning 2023-yil 11-dekabrdagi qo‘shma qarori bilan Ekspertlar kengashi tarkibi tasdiqlangan.
Loyihada bundan tashqari bir qator a’zolar faoliyat yuritmoqda. Jumladan:
- Iqtisodiyot, siyosatshunoslik, tabiiy fanlar, ekologiya, sun’iy intellekt kabi turli yo‘nalishlardan 30 dan ortiq ekspert-mutaxassis;
- 41 nafar tarjimon;
- 28 nafar muharrir;
- 12 nafar musahhih;
- 10 nafar sahifalovchi va muqova dizaynerlari.
Umumiy holda 120 dan ortiq mutaxassis ishlayapti.
Bundan tashqari, “1000KITOB” loyihasi kontent-menejer hamda tashkiliy-moliyaviy menejer lavozimi uchun nomzodlarni ishga taklif qiladi. Menejerlarga beriladigan vazifalar, talablar va takliflar xususida loyihaning ijtimoiy tarmoqdagi sahifalari orqali tanishish mumkin.
Izoh (0)