Salbiy rollarni shunday mahorat bilan o‘ynagan aktyorlar borki, yillar o‘tsa ham ularni ijobiy qahramon obrazida tasavvur qilish qiyin. Quyida ana shunday aktyorlar haqida so‘z boradi.
Ralf Fayns — “Garri Potter” va ”Shindler ro‘yxati”
Ralf Fayns faoliyatining aksariyat qismida salbiy rollar o‘ynagan va ularning baʼzilari orqali tomoshabinlar eʼtiboriga tushgan. Ayniqsa “Garri Potter”dagi Voldemort va “Shindler ro‘yxati”dagi Amon Gyot rollari orqali tomoshabinlarga yaxshi tanish. Aktyorning ko‘plab qiziqarli filmlari bo‘lsa-da, uni asosan salbiy rollari orqali tanishadi. Aktyorning ijobiy rollari ham yo‘q emas. Masalan: “Kingsman: Ibtido” filmida o‘g‘lini yo‘qotgan ota, “Grand Budapesht mehmonxonasi”da xizmatchi Gustav, “Ingliz bemori” filmida esa romantik inson rolini ijro etgan.
Jek Glison — “Taxtlar o‘yini”
Jek Glison uchun “Taxtlar o‘yini” filmidagi Joffri Barateon roli uning faoliyatidagi birinchi salbiy rol emas. Shu sababdan u hamma yomon ko‘radigan obrazlarni jonlantirishda eng yaxshi nomzod edi. Jek serialning suratga olish jarayoni tugamasdan turib, faoliyatini yakunlaganini maʼlum qildi. Sabab sifatida u har doim boshqa hayot tarziga intilgani aytildi. Qolaversa, muxlislari Jek o‘z faoliyatini unda katta iz qoldirgan filmdagi Joffri rolining taʼsiri tufayli yakunlaganini aytdi. Hatto “Taxtlar o‘yini” kitobi muallifi Jorj Martin ham filmning birinchi seriyasini ko‘rgandan so‘ng, Jekka maktub yuboradi va endi uni hamma yomon ko‘rishi bilan tabriklaydi.
Imelda Stonton — “Garri Potter”
“Garri Potter”da juda ko‘p salbiy qahramonlar bor va ular ichida eng yovuzi Voldemort bo‘lib ko‘rinadi, lekin u yovuzlik borasida Dolores Ambrij bilan tenglasha olmaydi. Shuni taʼkidlash kerakki, kitob muallifi Joan Rouling Ambrij obrazining prototipiga real hayotda duch kelgan.
Еntoni Starr — “Yigitlar”
“Yigitlar” kartinasidagi roligacha Antoni unchalik ham taniqli bo‘lmagan Yangi zelandiyalik aktyor edi. Bungacha ijro etgan eng katta roli “Banshi” teleserialida bo‘lgan. Hozir esa uni hamma “Yigitlar”dagi Houmlender roli orqali taniydi. Obraz unga uzoq vaqt hamrohlik qilsa kerak, chunki serialdan keyin Antonining xudbin odamdan boshqa qiyofada ko‘rinishiga ko‘nikish qiyin bo‘ladi. Shafqatsiz va yomon superqahramon.
Luiza Fletcher — “Kakku uyasi uzra parvoz”
“Kakku uyasi uzra parvoz” filmida Luiza Fletcher va uning yovuz hamshirasi Ratched uchun mehribonlik, rahm-shafqat haqidagi so‘zlar begona bo‘lgan. Ratched shu qadar qiziqarli obraz bo‘lib chiqdiki, oradan 45 yil o‘tib, u serial sifatida ekranlashtirildi. Unda Mildred rolini “Amerikancha dahshatli hikoya” filmi qahramoni Sara Polson o‘ynagan.
Kristof Vals —“Manfur kimsalar”
Kino ixlosmandlari amerikalik rejissor Kventin Tarantinoga nafaqat ajoyib filmlari uchun, balki avstriyalik taniqli aktyor Kristof Valsni Gollivudda kashf qilgani uchun ham rahmat aytishi kerak. Kristofni Tarantino “Manfur kimsalar” filmidagi Gans Land roliga taklif qilguniga qadar uzoq yillar davomida vatanida ijod qilgan. Kristof boshqa rollarda ham muvaffaqiyat qozondi: “Alita: Jangchi farishta” fantastik filmida Doktor Dayson Idoni mahorat bilan o‘ynadi. Lekin baribir Kristof yovuz rollardan uzoqlashmadi.
Lina Hidi — “Taxtlar o‘yini”
Lina Hidining taʼkidlashicha, “Taxtlar o‘yini” muxlislari dastlab aktrisadan Serseya roli sabab qattiq nafratlangan. Bir uchrashuvda ular aktrisadan qochib, yonidagi boshqa aktyorlardan imzo olgan. Taʼkidlashicha, u bilan bunday holatlar ko‘p sodir bo‘ladi. Keyinchalik aktrisa bir qator ijobiy rollarni ham ijro etdi. Ular orasida “300 ta spartalik”, “Bizni birga tasavvur qil” kabi filmlar bor.
Izoh (0)