Isroil va G‘azodagi o‘t ochishni to‘xtatish bo‘yicha vositachilar 24 soat ichida yarash bitimi loyihasi va anklavda garovga olinganlarni ozod qilish bo‘yicha HAMAS harakatining javobini kutmoqda.
Axios portali jurnalisti Barak Ravidning xabar qilishicha, “Isroil va vositachilar, xususan, Qatar, Misr va AQSH G‘azoda o‘t ochishni to‘xtatish va garovga olinganlarni ozod qilish to‘g‘risidagi bitim loyihasi bo‘yicha kelishuvga erishgan va u HAMASga yuborilgan”.
Ravid bilan suhbatlashgan ikki isroillik amaldorning ta’kidlashicha, HAMASning javobi yaqin bir sutka ichida berilishi kutilmoqda.
“Kelishuvga yaqinlashganga o‘xshaymiz. So‘nggi kunlarda Isroilning qator masalalar bo‘yicha pozitsiyasi juda moslashuvchan edi, ammo biz HAMASdan javob kutmoqdamiz va shundagina aniq bilamiz”, deya jurnalist suhbatdoshlaridan birining so‘zlarini keltirmoqda.
Avvalroq Qatar yakuniy kelishuv loyihasini Isroil va Falastinning HAMAS harakati vakillariga topshirgani haqida xabar berilgan edi.
11-yanvar kuni Isroil bosh vaziri Binyamin Netanyaxu muzokarachilarga G‘azoda garovga olinganlarni ozod qilish bo‘yicha maslahatlashuvlarni davom ettirish uchun Dohaga borishni buyurgan.
12-yanvar kuni AQSH prezidenti Jo Baydenning milliy xavfsizlik bo‘yicha yordamchisi Jeyk Sallivan CNN telekompaniyasi efirida tomonlar Yaqin Sharqda o‘t ochishni to‘xtatish bo‘yicha kelishuvga “juda yaqin” ekanini ma’lum qildi. Shu bilan birga, u bu 20-yanvar kuni Trampning inauguratsiyasiga qadar sodir bo‘lishi mumkinligini taxmin qilgan. 12-yanvar kuni kechqurun Isroil bosh vaziri kanselyariyasi Netanyaxu Bayden bilan G‘azo sektori bo‘yicha muzokaralar taraqqiyotini telefon orqali muhokama qilganini aytgan.
Shuningdek, Al Jazeera nashri AQSH prezidenti Jo Bayden Netanyaxu bilan G‘azoda o‘t ochishni to‘xtatish bo‘yicha suhbatlashgani haqida xabar berdi.
Bayden muloqot davomida sulh tuzish, Falastin anklavida ushlab turilgan isroillik asirlarni qaytarish zarurligini ta’kidladi. 2024-yil davomida AQSH, Misr va Qatar vositachiligida muzokaralar tashkillashtirilgan. Ularga erishish yaqin qolgan paytda bir necha bor to‘xtatilgan. Shunga qaramay, so‘nggi kunlarda AQSH rasmiylari kelishuv imzolanishiga umid bildirdi.
Izoh (0)