Исроил ва Ғазодаги ўт очишни тўхтатиш бўйича воситачилар 24 соат ичида яраш битими лойиҳаси ва анклавда гаровга олинганларни озод қилиш бўйича ҲАМАС ҳаракатининг жавобини кутмоқда.
Axios портали журналисти Барак Равиднинг хабар қилишича, “Исроил ва воситачилар, хусусан, Қатар, Миср ва АҚШ Ғазода ўт очишни тўхтатиш ва гаровга олинганларни озод қилиш тўғрисидаги битим лойиҳаси бўйича келишувга эришган ва у ҲАМАСга юборилган”.
Равид билан суҳбатлашган икки исроиллик амалдорнинг таъкидлашича, ҲАМАСнинг жавоби яқин бир сутка ичида берилиши кутилмоқда.
“Келишувга яқинлашганга ўхшаймиз. Сўнгги кунларда Исроилнинг қатор масалалар бўйича позицияси жуда мослашувчан эди, аммо биз ҲАМАСдан жавоб кутмоқдамиз ва шундагина аниқ биламиз”, дея журналист суҳбатдошларидан бирининг сўзларини келтирмоқда.
Аввалроқ Қатар якуний келишув лойиҳасини Исроил ва Фаластиннинг ҲАМАС ҳаракати вакилларига топширгани ҳақида хабар берилган эди.
11 январь куни Исроил бош вазири Биньямин Нетаньяху музокарачиларга Ғазода гаровга олинганларни озод қилиш бўйича маслаҳатлашувларни давом эттириш учун Доҳага боришни буюрган.
12 январь куни АҚШ президенти Жо Байденнинг миллий хавфсизлик бўйича ёрдамчиси Жейк Салливан CNN телекомпанияси эфирида томонлар Яқин Шарқда ўт очишни тўхтатиш бўйича келишувга “жуда яқин” эканини маълум қилди. Шу билан бирга, у бу 20 январь куни Трампнинг инаугурациясига қадар содир бўлиши мумкинлигини тахмин қилган. 12 январь куни кечқурун Исроил бош вазири канселярияси Нетаньяху Байден билан Ғазо сектори бўйича музокаралар тараққиётини телефон орқали муҳокама қилганини айтган.
Шунингдек, Al Jazeera нашри АҚШ президенти Жо Байден Нетаньяху билан Ғазода ўт очишни тўхтатиш бўйича суҳбатлашгани ҳақида хабар берди.
Байден мулоқот давомида сулҳ тузиш, Фаластин анклавида ушлаб турилган исроиллик асирларни қайтариш зарурлигини таъкидлади. 2024 йил давомида АҚШ, Миср ва Қатар воситачилигида музокаралар ташкиллаштирилган. Уларга эришиш яқин қолган пайтда бир неча бор тўхтатилган. Шунга қарамай, сўнгги кунларда АҚШ расмийлари келишув имзоланишига умид билдирди.
Изоҳ (0)