Isroil mudofaa vaziri Isroil Kats 2024-yil iyulida Tehronda HAMAS siyosiy byurosi rahbari Ismoil Haniyaning o‘ldirilishi ortida Isroil rasmiylari turganini birinchi marta tasdiqladi, deb yozadi The Times of Israel.
Kats Isroilga raketa va dronlarni uchirayotgan Yamandagi husiylarga qarshi kurash haqida gapirar ekan, bu haqda eslatib o‘tdi. Vazir Isroil harbiylari husiylar infratuzilmasiga zarba berishda davom etishiga va’da berdi.
Biz ularning rahbarlarining boshini kesib tashlaymiz. Biz Tehron, G‘azo va Livanda Haniya, uning vorisi Yahyo Sinvar hamda Livan “Hizbulloh”i rahbari Hasan Nasrulloh bilan qilganimiz kabi, biz buni Hodeyda va Sanoda ham amalga oshiramiz, dedi Kats.
HAMAS yetakchilaridan biri Ismoil Haniya 2024-yil 31-iyulga o‘tar kechasi Tehronda o‘ldirilgan edi. Isroil hodisa uchun javobgarlikni rasman o‘z zimmasiga olmagan.
Eron oliy rahnamosi Ali Xomanaiy Haniya o‘ldirilganidan keyin bir necha soat ichida Isroilga to‘g‘ridan to‘g‘ri zarba berishni buyurgan. Keyinroq NYT nashri G‘azo bo‘yicha muzokaralarni to‘xtatmaslik uchun hujum keyinga surilganini aytgan.
Haniyaning o‘limidan so‘ng, HAMASga Yahyo Sinvar boshchilik qilgan, uni Isroil 2023-yil oktyabrdagi “hujumi uyushtiruvchisi” deb atagan. Sinvar 17-oktyabr kuni Isroil hujumida halok bo‘lgan.
Izoh (0)