Isroil mudofaa kuchlari askarlari G‘azo sektori shimolidagi Jabaliya shahri yaqinida HAMAS harakatining umumiy uzunligi 2 kilometr bo‘lgan tunnelini portlatib yubordi. Bu haqda armiya matbuot xizmati xabar berdi.
“Bir necha o‘nlab metr chuqurlikda bo‘lgan yerosti yo‘li yo‘q qilindi”, deyiladi xabarda.
Armiya matbuot xizmatiga ko'ra, tunnel uzoq vaqtdan beri HAMAS tomonidan "boshpana sifatida" foydalanilgan.
Shuningdek, Isroil harbiylari portlovchi moddalar ishlab chiqarish uchun foydalanilgan inshootni ham yo'q qilganini xabar bergan.
Avvalroq Isroil armiyasi G‘azo sektori markazidagi Nuseyrat qochqinlar lagerida Al-Quds al-Yavm (alqudstoday-tv) telekanalining mashinasini portlatib yuborgani xabar qilingandi.
Portlash oqibatida besh nafar ommaviy axborot vositalari xodimi halok bo‘ldi.
G‘azo hukumati matbuot xizmati ma’lumotlariga ko‘ra, halok bo‘lganlarning barchasi telekanal xodimlari – operator Eymen al-Jediy, jurnalistlar Faysal Abu al-Qumsan, Ibrohim al-Shayx Ali, Muhammad al-Led va Fadi Xasunlardir. Mashinadan jonli efir uchun foydalanilgan.
Hisobotga ko‘ra, G‘azo sektorida Isroil tomonidan o‘ldirilgan ommaviy axborot vositalari xodimlari soni 201 nafarga yetdi. G‘azo hukumati OAV xodimlariga qilingan hujum, qotillik va suiqasdlarni keskin qoraladi.
Izoh (0)