AQSH prezidenti Jo Bayden Isroil bosh vaziri Binyamin Netanyaxu bilan G‘azoda o‘t ochishni to‘xtatish bo‘yicha suhbatlashdi. Bu haqda Al Jazeera xabar berdi.
Bayden muloqot davomida sulh tuzish, Falastin anklavida ushlab turilgan isroillik asirlarni qaytarish zarurligini ta’kidladi. 2024-yil davomida AQSH, Misr va Qatar vositachiligida muzokaralar tashkillashtirilgan. Ularga erishish yaqin qolgan paytda bir necha bor to‘xtatilgan. Shunga qaramay, so‘nggi kunlarda AQSH rasmiylari kelishuv imzolanishiga umid bildirdi.
Muzokaralarning so‘nggi raundi Qatar poytaxti Doha shahrida bo‘lib o‘tmoqda. Unda Isroilning Mossad tashqi razvedka agentligi rahbari Devid Barnea, shuningdek, Baydenning Yaqin Sharqdagi yetakchi maslahatchisi Brett MakGurk ishtirok etmoqda.
Barneaning ishtiroki har qanday kelishuvni imzolashi kerak bo‘lgan yuqori darajadagi Isroil rasmiylari muzokaralarda ishtirok etayotganini anglatadi.
Isroil razvedka rahbarlari, saylangan prezident Trampning Yaqin Sharq bo‘yicha vakili va Qatar bosh vaziri o‘rtasidagi muzokaralardan so‘ng, Dohada muhim kelishuvga erishildi. Qatar Isroil va HAMASga G‘azo sektorida o‘t ochishni to‘xtatish rejimini joriy etish va garovga olinganlarni ozod qilish bo‘yicha yakuniy kelishuv loyihasini topshirdi.
Izoh (0)