Isroil prezidenti Isxak Gertsog HAMAS bilan yarashish bitimiga hali erishilmaganini bildirdi. Ushbu kelishuv ehtimoli tobora ortib borayotganiga qaramay, Isroil va HAMAS rasmiylari o‘rtasidagi muzokaralar hali biror-bir sezilarli natijaga erishmagan.
Hozirda Isroil delegatsiyasi Qatarda HAMASning kelishuv tafsilotlari bo‘yicha javobini kutayotgani ma’lum, biroq Ynet nashri manbasining xabar berishicha, hozircha ijobiy javob ehtimoli past ko‘rinmoqda.
Shuningdek, Gertsog G‘azoda 444 kundan beri asosiy insonparvarlik yordami, dori-darmonlar va Qizil Xoch vakillari tashrifisiz asirlikda saqlanayotgan 100 ga yaqin garovga olinganlar haqida eslatib o‘tgan.
Al Jazeera nashri avvalroq Isroil qo‘shinlari G‘azo shimolida joylashgan “Kamol Advon” kasalxonasiga kamikadze robotlari bilan hujum qilgani haqida xabar bergandi.
Bu Isroil armiyasi (SAXAL) tomonidan Falastin anklavida bunday qurilmalarni qo‘llashning birinchi holatidir. Yahudiy armiyasi shifoxonani o‘qqa tutishda tanklardan va zarba berishda dronlardan foydalanmoqda. Tibbiyot muassasasida 400 ga yaqin fuqaro, jumladan, chaqaloqlar saqlanmoqda.
Otishma tufayli tinch aholini evakuatsiya qilish qiyin. Shifoxona direktori Husam Abu Safiyaning aytishicha, muassasa yaqinida ikkita jangovar robot portlab, binoga zarar yetkazgan va 20 ga yaqin odam yaralangan. Bundan tashqari, Dayr-al-Balah markazida gumanitar yordam kolonnasiga dron hujumi qilgan, oqibatda to‘rt kishi halok bo‘lgan. Bir kecha-kunduz ichida SAXAL zarbalarida halok bo‘lganlar soni 26 nafarga yetgan.
2023-yil 7-oktyabr kuni Falastinning HAMAS harakati Isroilga qilgan hujumidan keyin Yaqin Sharqdagi vaziyat keskinlashdi. Bunga javoban Isroil Falastin anklavini qamal qilganini e’lon qildi va G‘azo, shuningdek, Livan va Suriyani o‘qqa tutdi, quruqlikdagi operatsiyani boshladi. Isroil va u bilan bog‘liq kemalarga ham husiylar zarba bermoqda.
Izoh (0)