Janubiy Koreya Korrupsiyaga qarshi tergov departamenti politsiyaga yuqori martabali amaldorlarni hibsga olish vakolatini topshirganidan so‘ng, mamlakat politsiyasi prezident Yun Sok Yolni hibsga olish orderini ijro etish vazifasini o‘z zimmasiga olishdan amalda bosh tortdi.
“Yuridik tekshiruvdan so‘ng biz Korrupsiyaga qarshi kurashish boshqarmasi tomonidan qamoqqa olish orderini qo‘llash to‘g‘risidagi xabarnoma huquqiy jihatdan munozarali degan xulosaga keldik. Qamoqqa olish orderini qo‘llash bo‘yicha boshqarma bilan maslahatlashuvlarni davom ettirishga qaror qildik”, dedi harbiy holat voqealari bilan shug‘ullanuvchi maxsus tergov guruhi rahbari o‘rinbosari.
Agentlikning aniqlik kiritishicha, politsiya “amalda buyruqni bajarishdan bosh tortish niyatini ko‘rsatgan”. Yuqori martabali amaldorlarga nisbatan Korrupsiyaga qarshi tergov boshqarmasi (CIO) 5-yanvardan 6-yanvarga o‘tar kechasi isyon ishi bo‘yicha Yun Sok Yolni hibsga olish uchun order qo‘llashni politsiyaga topshirishga qaror qilgan edi. Orderning amal qilish muddati 6-yanvarda tugaydi. Boshqarma uni uzaytirish uchun sudga ariza berish niyatida.
Yun SokYolning advokatlari hibsga olish qarori “yana bir qonun buzilishi” ekanligini aytdi. Ular avvalroq yuqori darajadagi korrupsiyaga qarshi tergov departamenti isyonni tergov qilish vakolatiga ega emasligi sababli order haqiqiy emasligini ta’kidlagan edi.
CNN nashri 3-yanvar kuni Yun Sok Yolni hibsga olish uchun tergovchilar va politsiya xodimlari uning qarorgohiga kelgani, biroq prezident qo‘riqchilarining qarshiligi tufayli prezident hibsga olinmagani haqida xabar bergan edi.
Xavfsizlik maqsadida Janubiy Koreya prezidentini hibsga olish to‘g‘risidagi order ijrosi to‘xtatilgan. Davom etayotgan qarama-qarshilik tufayli hibsga olish orderini amalda bajarish imkonsiz degan xulosaga kelingan.
Voqea joyiga kelgan xodimlarning xavfsizligi yuzasidan xavotir sababli, order ijrosi to‘xtatilgan. Politsiya prezident qarorgohi atrofida tartibni saqlash uchun 45 ta maxsus kuch bo‘linmasi va 2,7 ming xodimni joylashtirgandi. Qarorgoh yonida “prezidentni himoya qilish” va “impichmentni bekor qilish”ga chaqiruvchi 1 ming 200 nafar Yun tarafdorlari to‘plangan. Ularning ba’zilari politsiya bilan to‘qnashuvga kirishgandi. Tergovchilar va politsiya prezident qo‘riqchilarining qarshiligiga duch kelgandi.
Izoh (0)