Janubiy Koreyaning Muan aeroportida halokatga uchragan Jeju Air samolyotining ikkala registratorida ham parvozning so‘nggi daqiqalari qayd etilmagan. Koreya transport vazirligining ma’lum qilishicha, qora qutilar halokatga to‘rt daqiqa qolganda yozib olishni to‘xtatgan, deb xabar berdi Yonhap.
Samolyot ertalab soat 9:03 da halokatga uchradi, ikkita registrator 8:59 da ma’lumotlarni yozib olishni to‘xtatgan. Parvoz haqidagi so‘nggi daqiqalarning yo‘qligi halokatni tekshirishni qiyinlashtiradi. Biroq agentlik qayd etganidek, yozuvlar tergovchilar uchun yagona manba emas. “Tekshiruv turli axborot manbalari, jumladan, havo harakatini boshqarish yozuvlari, halokat videolari va voqea joyidagi qoldiqlar tahlilini o‘z ichiga oladi”, deya tergov guruhi so‘zlaridan iqtibos keltirgan Yonhap agentligi.
Ayni paytda Vashingtonda qora qutilar tahlil qilinmoqda. Yonhap agentligi xabariga ko‘ra, tergovni davom ettirish uchun yozib olish uskunalari dushanba kuni Koreyaga qaytariladi.
29-dekabr, yakshanba kuni mahalliy vaqt bilan soat 9:07 da Jeju Air aviakompaniyasining Boeing 737-800 yo‘lovchi samolyoti Janubiy Koreyada halokatga uchradi. Tailandning Bangkok shahridan Janubiy Koreyaning Muan shahriga uchayotgan samolyot qo‘nish vaqtida uchish-qo‘nish yo‘lagidan chiqib ketgan va panjaraga urilgan, shundan so‘ng u ikki qismga bo‘lingan va yonib ketgan, 177 nafardan ortiq odam halok bo‘lgan.
So‘nggi bir oy ichidagi samolyotlar bilan bog‘liq hodisalar
25-dekabr kuni Boku—Grozniy marshruti bo‘yicha uchgan samolyot Qozog‘istonning Oqtov shahrida qulagan, oqibatda 38 nafar odam halok bo‘lgandi.
28-dekabr kuni Kanadaning Galifaks aeroportida samolyot qo‘nish chog‘ida yonib ketgani xabar qilingan. Yo‘lovchilarning so‘zlariga ko‘ra, samolyot shassisining g‘ildiraklaridan biri ishlamay qolgan. Galifaks aeroporti samolyot bortidagi barcha yo‘lovchilar va ekipaj a’zolari evakuatsiya qilinganini xabar berdi.
29-dekabr kuni Birlashgan Arab Amirliklarida Jazirah Aviation Club aviakompaniyasiga tegishli yengil motorli samolyot dengizga qulab tushdi. Ma’lum qilinishicha, aviahalokat oqibatida uchuvchi va hamrohi halok bo‘lgan.
4-yanvar kuni Airbus A321 yo‘lovchi samolyoti Misrning Sharm-ash-Shayx shahridagi aeroportga favqulodda qo‘nishga majbur bo‘lgan edi.
Izoh (0)