Kreml Ukrainadagi urush tugaganidan keyin Belarusni Rossiyaga qo‘shib olish rejasiga qaytishi mumkin. Bu haqda prezident ma’muriyatiga yaqin manbalar Meduza’ga xabar berdi.
Ularning so‘zlariga ko‘ra, bu ikki davlatning umumiy hokimiyat organlari tashkil etiladigan “chuqurroq integratsiyasi” sifatida berilishi mumkin.
“Ularni tanlash, kampaniya o‘tkazish, hatto yangi rekordlarni ko‘rsatish ham mumkin. Bu 1980—1990-yillarda parchalangan yerlarning qayta birlashishi, respublikalar ittifoqidir”, deya tushuntirdi suhbatdoshlardan biri.
Biroq u bu ssenariyning amalga oshirilishi “butunlay Belarus prezidenti Aleksandr Lukashenkoga bog‘liq ekanini va u, shubhasiz, to‘liq huquqli hukmdor bo‘lib qolishni xohlayotganini” ta’kidlab o‘tdi.
Belarusda navbatdagi prezidentlik saylovi arafasida 1994-yildan buyon mamlakat prezidenti lavozimida ishlab kelayotgan va yettinchi prezidentlik muddatiga da’vogarlik qilayotgan Lukashenko yaqin kelajakda hokimiyatni yangi avlodga topshirishga tayyorligini ma’lum qildi.
“Men bu hokimiyatni yangi avlodga sekin, xotirjam o‘tkazish uchun qo‘limdan kelgan hamma ishni qilaman. Chunki men yangi hokimiyat davrida ham yashashga umid qilaman”, dedi Lukashenko.
Shu bilan birga, u sog‘lig‘i imkon berguncha davlat lavozimida ishlashni davom ettirishini qo‘shimcha qilgan.
2024-yil dekabr oyida Lukashenko va Rossiya prezidenti Vladimir Putin o‘zaro xavfsizlik kafolatlari to‘g‘risidagi shartnomani imzolagan edi. Hujjat, jumladan, tomonlarning mudofaa, har ikki davlatning suvereniteti, mustaqilligi va konstitutsiyaviy tuzumini himoya qilish, shuningdek, Ittifoq davlati hududining yaxlitligi va tashqi chegarasining daxlsizligini ta’minlash sohasidagi majburiyatlarini belgilaydi. Unda, shuningdek, Rossiyaning taktik yadro qurolini Belarusda joylashtirish qoidalari ham ko‘rsatilgan.
Ukrainada keng ko‘lamli urush boshlanishidan ancha oldin Kreml 2030-yilgacha Belarusni “asta-sekin qo‘shib olish” rejasini tayyorlagan edi. Rejaga Rossiya va Belarus qonunlarini “uyg‘unlashtirish”, “kelishilgan tashqi va mudofaa siyosati”, shuningdek, Rossiya manfaatlari asosida “savdo-iqtisodiy hamkorlik” rejalari kiritilgan.
Ukrainada urush boshlanganidan so‘ng Lukashenko Moskva va Minsk “ikki mustaqil davlat birligi”ni shakllantirib, birgalikda sanksiyalarni yengib o‘tishini ma’lum qilgan. Shu bilan birga, u o‘zi va Putin “Belarusni Rossiya tarkibiga qo‘shish uchun eski usullarni qo‘llaydigan darajada nodon emasliklarini” ta’kidlab o‘tgan.
Izoh (0)