Rossiya 2025-yilgi prezidentlik saylovlarida Belarusdagi vaziyatni beqarorlashtirishga urinishgan taqdirda Minskka “yordam” ko‘rsatadi. Bu haqda Rossiyaning Minskdagi elchisi Boris Grizlov xabar berdi.
Agar kerak bo‘lsa, Rossiya o‘z majburiyatlari doirasida, shubhasiz, eng yaqin ittifoqchimiz va strategik hamkorimiz so‘raydigan yordam va qo‘llab-quvvatlov ko‘rsatadi, dedi Grizlov.
U Belarus huquqni muhofaza qilish organlari va maxsus xizmatlariga “quruqlikda” yordam berish talab etilmasligi, chunki ular “vazifalarini a’lo darajada uddalashini” aytdi.
Shuningdek, elchi Moskva “real vaqt rejimida” Minskka potensial tahdidlar haqidagi ma’lumotlarni uzatayotganini ta’kidladi. U Belarusda prezidentlik saylovlari paytida “provokatsiyalar uyushtirilishi” mumkinligini istisno qilmadi.
Belarus davlati rahbari ham, huquq-tartibot idoralari rahbarlari ham saylovlar arafasida bunday xatti-harakatlar kuzatilishi mumkinligi haqida ogohlantirilgan. Bu faktning o'zi Belarus huquq-tartibot idoralari yaqinlashib kelayotgan provokatsiyalardan yaxshi xabardor ekanidan dalolat beradi. Xabardor ekan, demak ular tayyor, deya xulosa qildi Grizlov.
Belarusda yangi prezidentlik saylovlari 2025-yil 26-yanvarga belgilangan. Markaziy saylov komissiyasi saylov kampaniyasi boshlanganini e’lon qilgan. Belarus rahbari Aleksandr Lukashenko prezidentlik saylovlarida o‘z nomzodini ko‘rsatish niyatida ekanini ma’lum qilgan.
Boraman, boraman, boraman. Muxolifatga yetkazinglar, boraman! Vaziyat qanchalik murakkablashsa, ular jamiyatimizni qanchalik faol bezovta qilsa, sizni, meni va jamiyatni qanchalik ko‘p taranglashtirsa, men bu saylovlarga shunchalik tez boraman. Tashvishlanmang, biz Belarus uchun nima zarur bo‘lsa, shuni amalga oshiramiz, degan Lukashenko “BelTA” agentligiga.
Keyinchalik u nutqini tuzatgan. “Ko‘p narsa o‘zgarishi mumkin. Tabiiy ravishda, men va barchamiz, jamiyat sodir bo‘ladigan o‘zgarishlarga va ovoz berish paytiga kelib qanday vaziyatga duch kelishimizga qarab munosabat bildiramiz”, degan u.
Izoh (0)