Polsha NATOning yadro qurolini Nuclear Sharing dasturi doirasida hududiga joylashtirishga tayyor. Bu haqda Polsha prezidenti Anjey Duda Fakt gazetasiga bergan intervyusida ma’lum qildi.
“Agar ittifoqchilarimiz NATOning sharqiy qanoti xavfsizligini mustahkamlash maqsadida hududimizda yadro qurolini joylashtirishga qaror qilgan bo‘lsa, biz bunga tayyormiz. Shimoliy Atlantika alyansi ittifoqchisimiz va bu borada majburiyatlarga egamiz, ya’ni umumiy siyosat olib boramiz”, — dedi Duda.
Polsha prezidenti bu masala Vashington va Varshava o‘rtasidagi muzokaralar mavzusi ekanini bildirdi.
“Men bir necha bor bu haqda gapirganman . Tan olishim kerakki, mendan bu haqda so‘rashganida, tayyorligimizni bildirdim”, — deya ta’kidladi u.
Dudaning so‘zlariga ko‘ra, Rossiya Kaliningrad viloyatini harbiy jihatdan mustahkamlashda davom etmoqda, shuningdek, Belarus hududida yadro qurolini ham joylashtirgan.
Kreml munosabati
Kreml matbuot kotibi Dmitriy Peskov Polshaning Amerika yadroviy qurollarini hududiga joylashtirishiga javob choralari ko‘rilishini aytdi.
“Agar bu amalga oshsa, harbiylar, albatta, vaziyatni tahlil qiladi. O‘ylaymanki, har qanday holatda ham ular bizning xavfsizligimizni kafolatlash uchun barcha zarur javob choralarini ko‘radi”, — dedi Kreml matbuot kotibi.
NATOning Nuclear Sharing dasturi yadroviy qurollarga ega bo‘lmagan alyans mamlakatlariga AQSH qurollarini joylashtirish imkonini beradi. Yevropa va Turkiyada 100 ta taktik yadro quroli mavjud. B61-3 va B61-4 bombalari uchun 0,3 dan 50 kilotongacha bo‘lgan zaryadlar Belgiya, Germaniya, Italiya, Niderlandiya va Turkiyadagi oltita bazada saqlanadi.
Izoh (0)