Rossiya prezidenti Vladimir Putin Ozarbayjon prezidenti Ilhom Aliyev bilan suhbat chog‘ida AZAL samolyoti bilan sodir bo‘lgan fojiali voqea uchun uzr so‘radi. Bu haqda Kreml xabar berdi.
Davlat rahbarlari Rossiya tomoni tashabbusi bilan bo‘lib o‘tgan qo‘ng‘iroq chog‘ida vaziyatni muhokama qilgan.
“Vladimir Putin fojiali hodisa Rossiya havo hududida yuz bergani uchun uzr so‘radi va qurbonlarning oila aʼzolariga yana bir bor chuqur hamda samimiy hamdardlik bildirdi, jarohatlanganlarning tezroq sog‘ayib ketishini tiladi”, deyiladi Kreml xabarida.
Kremlning taʼkidlashicha, Ozarbayjon samolyoti Grozniy aeroportiga bir necha bor qo‘nishga uringan.
“O‘sha vaqtda Grozniy, Mozdok va Vladikavkaz Ukraina jangovar dronlari tomonidan hujumga uchragan va Rossiya havo hujumidan mudofaa tizimlari bu hujumlarni qaytargan”, deyiladi bayonotda.
Tergov qo‘mitasi tomonidan “Havo transporti harakati va harakat xavfsizligi qoidalarini buzish” moddasi bo‘yicha jinoiy ish qo‘zg‘atildi.
Ozarbayjon Bosh prokuraturasining ikki xodimi Tergov qo‘mitasi va Rossiya Bosh prokuraturasi vakillari bilan birgalikda Grozniyda ishlamoqda. Kremlning aniqlik kiritishicha, samolyot halokatga uchragan Oqtovda ham tegishli idoralar hamkorlik qilmoqda.
Qozog‘istondagi aviahalokat
Bokudan Grozniyga J28243 reysini amalga oshirayotgan Embraer 190 samolyoti 25-dekabr kuni ertalab Qozog‘istonning Oqtov shahri yaqinida halokatga uchradi. Dispetcherlar Grozniy va Maxachqal’ada qo‘nishni rad etganidan keyin layner majburiy qo‘nishni amalga oshirishga urindi. Oqtov aeroportiga bir necha kilometr qolganda u qulab tushdi, portlab, yonib ketdi.
Burun qismi to‘liq yongan, dum qismida esa omon qolganlar bo‘lgan. Kamida 29 nafar tirik qolgan yo‘lovchi aynan shu qismda bo‘lgan. Ular kasalxonaga olib kelingan. Azerbaijan Airlines samolyoti qulashi oqibatida 38 kishi halok bo‘lgan. Samolyot bortida jami 67 kishi — 62 yo‘lovchi va besh ekipaj a’zosi bo‘lgan.
Izoh (0)