Amerika urushni o‘rganish instituti ( ISW) tahlilchilari “Vagner” rahbari Yevgeniy Prigojin ommaga ko‘rinish bermayotganiga va urushga munosabat bildirishni to‘xtatganiga e’tibor qaratdi.
Mutaxassislar fikricha, Prigojin iyun oyidagi muvaffaqiyatsiz isyondan so‘ng deyarli jamoat joylarida ko‘rinmayapti. Biroq u Afrika qit’asidagi “Vagner” bo‘yicha savollarga munosabat bildirishda davom etmoqda.
“ ‘Vagner’ga aloqador Telegram kanali 15-avgust kuni Prigojinning audioyozuvini e’lon qildi. Unda u Ganada ‘Vagner’ futbolkalarini kiygan namoyishchilar hibsga olinishi ehtimoli haqida gapirgan. Prigojin bu Afrikada va butun dunyoda ‘Vagner’ni qo‘llab-quvvatlashayotganidan dalolat berishini aytgan”, — deydi tahlilchilar.
8-avgust kuni “Vagner”ga aloqador kanallar Prigojin Nigerdagi davlat to‘ntarishi va “Vagner”ning Afrikada mavjudligini muhokama qilgan audioyozuvni e’lon qilgan.
O‘z navbatida, Ukrainaga qarshi urushda katta rol o‘ynagan “Vagner” rahbari frontdagi vaziyatga izoh berishdan o‘zini tiymoqda.
“Aftidan, Prigojin Ukrainadagi vaziyatni yoki ‘Vagner’ning Rossiya va Belarusdagi faoliyati haqida gapirish o‘rniga ‘Vagner’ning Afrikadagi manfaatlarini qo‘llab-quvvatlash uchun o‘zining cheklangan ommaviy murojaatlaridan foydalanmoqda. Bu uning Ukraina bilan urushda ishtirok etishiga, hatto ritorik jihatdan ham cheklovlarga rioya qilishini ko‘rsatishi mumkin”, — deya xulosa qildi ISW tahlilchilari.
Rossiyada isyonga urinish yoxud Prigojin isyoni
2023 yil 23—24-iyun kunlari Rossiyada “Vagner” xususiy harbiy kampaniyasi rahbari Yevgeniy Prigojin tomonidan isyon ko‘tarishga urinish bo‘ldi. Xususan, Prigojin “Adolat marshi”ni boshlaganini, uning maqsadi Moskvaga yetib borish ekanini aytdi.
U rus harbiylarini Rossiya mudofaa vaziri Sergey Shoygu va Bosh shtab boshlig‘i Valeriy Gerasimov buyrug‘i bilan “Vagner” lagerlariga hujum qilganlikda aybladi.
Qo‘zg‘olon paytida Rostov-Don va Voronej qo‘lga olindi, bir nechta vertolyotlar va harbiy samolyotlar urib tushirilgan, oqibatda kamida o‘n nafar rus harbiysi yo‘q qilingan.
Rossiya prezidenti Vladimir Putin Prigojinni davlatga xiyonatda aybladi. Biroq kechqurun, Belarus rahbari Aleksandr Lukashenko bilan muzokaralardan so‘ng Prigojin o‘z jangarilarining Moskvaga yurishini to‘xtatdi.
Kreml Prigojinga qarshi qurolli isyon bo‘yicha jinoiy ish to‘xtatilishi, “vagnerchi”lar jinoiy javobgarlikka tortilmasligi va Prigojinning o‘zi Belarusga ketishi mumkinligini bildirdi.
Bir necha kundan so‘ng Putin o‘z armiyasi va xavfsizlik kuchlariga isyonning oldini olgani uchun minnatdorlik bildirdi.
Izoh (0)