Armaniston bosh vaziri Nikol Pashinyan Minskdagi Kollektiv xavfsizlik shartnomasi tashkiloti (KXSHT) sammitida qatnashmasligini ma’lum qildi. Bu haqda “TASS” xabar berdi.
Pashinyan telefon orqali muloqot chog‘ida Belarus prezidenti Aleksandr Lukashenkoga KXSHTning Minskdagi sammitida ishtirok eta olmasligini aytgan.
“23-noyabr kuni Minskda bo‘lib o‘tadigan KXSHT Kollektiv xavfsizlik kengashi yig‘ilishini tashkil etish bilan bog‘liq masalalar muhokama qilindi. Bosh vazir Pashinyan Belarus prezidentiga uchrashuvda ishtirok eta olmasligini ma’lum qildi va KXSHT hamkorlari bu qarorga tushunish bilan munosabatda bo‘lishiga umid bildirdi”, — deyiladi xabarda.
Kreml munosabati
Rossiya prezidenti matbuot kotibi Dmitriy Peskov Armaniston bosh vaziri Nikol Pashinyanning KXSHT sammitida ishtirok etishdan bosh tortganini izohlar ekan, agar shunday bo‘lsa, faqat afsuslanishi, chunki bunday uchrashuvlar kelishib olishga yaxshi sabab ekanini bildirdi.
“Agar rostdan ham shunday bo‘lsa, afsus bildirishimiz mumkin, tushunamiz, har bir hukumat yoki davlat rahbarining ish jadvalida o‘z tadbirlari, majburiyatlari bo‘lishi mumkin”, — dedi Peskov.
Jurnalistlar Kreml Pashinyanning qarorini qanday qabul qilayotgani va Armanistonning KXSHTdan chiqishi ehtimolini qanday baholashi haqida Peskovdan so‘radi. Kreml rasmiysining ta’kidlashicha, KXSHT “hali ham dolzarbligicha qolmoqda”.
“KXSHT doirasida tashkil etilgan va o‘tkazilayotgan uchrashuvlar ishtirokchilar tomonidan hech bo‘lmaganda tegishli sohalarda o‘zaro hamkorlikning ushbu formatiga bo‘lgan talabni ko‘rsatadi”, — deya xulosa qildi Kreml matbuot kotibi.
Izoh (0)