Kremlda “Vagner” rahbari Yevgeniy Prigojinning dafn marosimi formati va sanasi haqida ma’lumot yo‘q. Bu haqda Rossiya prezidenti matbuot kotibi Dmitriy Peskov xabar berdi.
“Dafn marosimi haqida hozircha hech qanday ma’lumotga ega emasman, shuning uchun sizga hech narsa ayta olmayman”, — dedi u.
Peskov bu birinchi navbatda qarindoshlarning qaroriga bog‘liq bo‘lishini ta’kidladi. Dafn marosimining joyi va vaqti noma’lum bo‘lgani uchun prezidentning marosimda ishtirok etishi haqidagi “savolga javob bo‘lishi mumkin emas”, deya qo‘shimcha qildi Peskov.
23-avgust kuni Tver viloyatida Moskvadan Sankt-Peterburgga uchayotgan shaxsiy Embraer Legacy samolyoti halokatga uchradi. Samolyotdagi o‘n kishining bari halok bo‘lgan. Yo‘lovchilar qatorida “Vagner” rahbari Yevgeniy Prigojin va uning o‘rinbosari Dmitriy Utkin bo‘lgan.
Rossiya prezidenti Vladimir Putin va Checheniston rahbari Ramzan Qodirov uning oilasiga hamdardlik bildirdi.
“Men Prigojinni juda uzoq vaqtdan beri: 1990-yillarning boshidan beri taniyman. U taqdiri murakkab, hayotda jiddiy xatolarga yo‘l qo‘ygan odam edi. Kerakli natijalarga erishdi. U iqtidorli inson, iqtidorli tadbirkor edi. Nafaqat mamlakatimizda balki chet elda, xususan, Afrikada ham faol ishladi. U yerda neft, gaz, qimmatbaho metallar va toshlar bilan shug‘ullangan”, — degan Putin.
Peskov “Vagner” rahbarining o‘limiga Putin aloqadorligini rad etdi. Tegishli fikrni Belarus rahbari Aleksand Lukashenko ham ilgari surdi. U Prigojin undan xavfsizlik kafolatlari so‘ramagani va “Vagner” Belarusda qolishini aytdi.
Ukraina prezidenti Vladimir Zelenskiy ham voqeaga munosabat bildirdi va Ukrainaning bunga aloqadorligini rad etdi. U aviahalokat ortida kim turganini hamma tushunishini aytdi.
Izoh (0)