Rossiya prezidenti Vladimir Putin Qozog‘iston prezidenti Qosim-Jo‘mart To‘qayev bilan telefon orqali suhbat qildi. Muloqot Moskva tashabbusi bilan amalga oshirildi, deb xabar bermoqda Kreml matbuot xizmati.
“Davlat rahbarlari 25-dekabr kuni Oqtov shahri yaqinida Ozarbayjon havo yo‘llari aviakompaniyasi samolyotining halokati munosabati bilan qurbonlar oilasiga ta’ziya bildirishdi. Ushbu samolyotda Rossiya va Qozog‘iston fuqarolari ham bo‘lgan”, deyiladi xabarda.
Barcha tafsilotlarni tekshirish bilan shug‘ullanayotgan Qozog‘iston hukumat komissiyasi samolyot halokati joyida topilgan “qora quti”ni o‘qib chiqish uchun Rossiya, Ozarbayjon va Braziliyadan mutaxassislarni jalb etadi.
“Qozog‘iston hududida amalga oshiriladigan bu ishlar xolisona va shaffof tarzda olib boriladi”, deyiladi xabarda.
Shuningdek, xabarda ta’kidlanishicha, ikki davlat rahbarlari Ozarbayjon samolyoti bilan bog‘liq fojiali hodisaning barcha holatlarini tekshirish masalalari bo‘yicha ham, Rossiya—Qozog‘iston hamkorligini yanada rivojlantirishning dolzarb mavzulari bo‘yicha ham doimiy aloqada bo‘lishadi.
Qozog‘istondagi aviahalokat
Bokudan Grozniyga J28243 reysini amalga oshirayotgan Embraer 190 samolyoti 25-dekabr kuni ertalab Qozog‘istonning Oqtov shahri yaqinida halokatga uchradi. Dispetcherlar Grozniy va Maxachqal’ada qo‘nishni rad etganidan keyin layner majburiy qo‘nishni amalga oshirishga urindi. Oqtov aeroportiga bir necha kilometr qolganda u qulab tushdi, portlab, yonib ketdi.
Burun qismi to‘liq yongan, dum qismida esa omon qolganlar bo‘lgan. Kamida 29 nafar tirik qolgan yo‘lovchi aynan shu qismda bo‘lgan. Ular kasalxonaga olib kelingan. Azerbaijan Airlines samolyoti qulashi oqibatida 38 kishi halok bo‘lgan. Samolyot bortida jami 67 kishi — 62 yo‘lovchi va besh ekipaj a’zosi bo‘lgan.
Izoh (0)