Fransuzlarning 60 foizdan ortig‘i respublika prezidenti Emmanuel Makronning iste’fosini yoqlab chiqdi.
Le Figaro gazetasi buyurtmasi bilan Odoxa-Backbone sotsiologik xizmati tomonidan o‘tkazilgan so‘rov natijalari shundan dalolat beradi.
Respondentlarning 61 foizi amaldagi davlat rahbarining iste’fosini yoqlaydi. Nashr taʼkidlaganidek, 2024-yil sentyabridan buyon bu ko‘rsatkich 7 foiz punktga oshgan. Respondentlarning 38 foizi Makron iste’foga chiqishiga qarshi, tadqiqot ishtirokchilarining yana 1 foizi aniq javob berishga qiynaldi.
Bundan tashqari, respondentlarning 62 foizi Makronning prezidentligini avtoritar deb ta’riflaydi. Ko‘pchilik fransuzlar ham Fransua Bayru yil oxirigacha bosh vazir bo‘la olmaydi, deb hisoblaydi – respondentlarning 86 foizi Fransiya prezidenti 2025-yilda yangi bosh vazirni tayinlashi kerakligiga ishonchi komil.
Avvalroq Politico yilning eng omadsiz siyosatchilarini e’lon qilgandi. Bu ro‘yxatdan nashri Rossiya prezidenti Vladimir Putin, Germaniya kansleri Olaf Shols, Vengriya bosh vaziri Viktor Orban va Suriyaning qochoq prezidenti Bashar Asad qatorida Fransiya prezidenti Emmanuel Makron ham o‘rin olgandi.
Politico nashri ta’kidlashicha, 2024-yil Makron uzluksiz muvaffaqiyatsizliklarga duch keldi: partiyasining Yevroparlament saylovlaridagi mag‘lubiyatidan tortib, Fransiyada muddatidan oldingi saylovlargacha.
“Bu qiyinchiliklar bir yil ichida ikkita hukumatning qulashi bilan yakunlandi, uchinchi hukumatning qulashi esa, ehtimol, hali oldinda”, deya tahririyat mulohaza qilgan.
Izoh (0)