Germaniya kansleri Olaf Shols va Fransiya prezidenti Emmanuel Makron AQSH tomonidan “nohalol raqobat”dan xavotirda va zarur bo‘lgan taqdirda “javob zarbasi berishga” tayyor. Bu haqda Politico nashri o‘z manbalariga tayanib yozmoqda.
Yetakchilar 26-oktabr kuni Parijda qariyb uch yarim soat suhbatlashgan. Yaqinda bo‘lgan kelishmovchiliklarga qaramay, ikkalasi ham, agar Vashington inflyatsiyani pasaytirish haqidagi qonunini ilgari suradigan bo‘lsa, Yevroittifoq harakatsizlik qila olmaydi, degan xulosaga kelgan. AQSHning ushbu qonunida AQSH hududida investitsiya kirituvchi kompaniyalar uchun soliqlar va energetik imtiyozlar haqida gap boradi. Fransiya va Germaniya bu qonun ularning avtomobil tarmog‘iga ta’sir qilishidan xavfsiramoqda.
Shols va Makron agar AQSH bunday siyosatni davom ettirsa, Yevroittifoq nohalol raqobatga yoki investitsiyalarni yo‘qotishga yo‘l qo‘ymaslik uchun, javob qaytarishiga to‘g‘ri keladi, degan fikrda. Bu, o‘z navbatida, Transatlantik munosabatlarni yangi savdo urushiga g‘arq qilishi mumkin, deb yozadi nashr.
O‘tgan hafta The Telegraph gazetasi Shols tomonidan, Fransiya bilan oldindan maslahatlashmagan holda, 200 milliard yevrolik ichki energetik yordam sxemasi ishga tushirilishi Parijni g‘azablantirgani haqida yozgandi. Shu tufayli Fransiya va Germaniya shu haftaga rejalashtirilgan hukumat maslahatlashuvlarini yanvargacha kechiktirgan.
Bundan tashqari, Fransiya tomoni Sholsning Xitoyga tashrif buyurib, Si Szinpin bilan uchrashish rejasidan norozi edi. Yelisey saroyidagilar kansler u yerga Makron bilan birga borishini kutgandi.
Fransiya yetakchisi avvalroq AQSHni energetika siyosatida “qo‘sh standartlar” tufayli tanqid qilgan edi. Uning so‘zlariga ko‘ra, Vashington suyultirilgan tabiiy gazni Yevropaga yuqori narxlarda sotmoqda, ammo mamlakat ichida gaz arzon.
Izoh (0)