Avvalroq Fransiya Kiyevga berishni va’da qilgan AMX-10 RC g‘ildirakli tanklari Ukrainaga ikki oy ichida yetkazib beriladi. Bu haqda Fransiya mudofaa vaziri ukrainalik hamkasbi Aleksey Reznikov bilan muzokaralar chog‘ida ma’lum qildi, deb yozadi “Kommersant”.
Fransiya Ukrainaga G‘arb tanklarini yetkazib berishni va’da qilgan birinchi mamlakatga aylangan edi. Mamlakat prezidenti Emmanuel Makron yanvar boshida Parij Kiyevga AMX-10 RC yengil tanklarini yo‘naltirishini aytgandi.
Fransiya ortidan Yevropaning boshqa davlatlari, shu jumladan, Polsha va Buyuk Britaniya ham Ukraina armiyasiga og‘ir tanklar yetkazib berishi haqida e’lon qildi. AQSH va Germaniya Kiyevga Marder jangovar piyoda mashinalari va Patriot zenit-raketa majmualarini taqdim etish niyatini ma’lum qildi.
Yanvar boshida Fransiya prezidenti Emmanuel Makron ukrainalik hamkasbi Vladimir Zelenskiyga Fransiya Ukraina armiyasiga AMX-10 RC zirhli avtomobillarini (ular yengil yoki g‘ildirakli tanklar deb ham ataladi) yetkazib berishini aytgan edi.
“Prezident AMX-10 RC yengil tanklarini yetkazib berishga rozi bo‘lib, Kiyevga ko‘rsatilayotgan harbiy yordamni kengaytirishga qaror qildi. Bu Ukraina armiyasiga G‘arbda ishlab chiqilgan tanklar yetkazib berilishi bilan bog‘liq birinchi holatdir”, — deya qayd etishdi Yelisey saroyida. Biroq Ukraina qurolli kuchlariga qachon va nechta AMX-10 RC zirhli avtomobillari yuborilishiga aniqlik kiritilmadi.
Shuningdek, Ukraina Fransiyadan Bastion bronetransportyorlarini ham oladi, dedi Zelenskiyning ofisi rahbari Andrey Yermak. Zelenskiyning o‘zi Makron bilan suhbat chog‘ida yengil tanklar va Bastion zirhli mashinalarini yetkazib berish haqida gap borganini tasdiqladi. “Rahmat, do‘stim! Sizning yetakchiligingiz bizning g‘alabamizni tezlashtirmoqda”, — deb yozdi Zelenskiy Makronga qarata.
AMX-10 RC zirhli avtomobillari 1981-yildan buyon Fransiya armiyasi arsenalida bo‘lib kelmoqda, ularning soni 247 dan oshmaydi. AMX-10 RC 105 mm kalibrli qurolga ega bo‘lib, u ikki kilometr masofada o‘t ocha oladi. Hozirgi paytda Fransiya AMX-10 RC’ni asta-sekinlik bilan Jaguar zirhli avtomobillariga almashtirmoqda.
Izoh (0)