Fransiya Milliy Assambleyasi bosh vazir Mishel Barne rahbarligidagi hukumatga ishonchsizlik votumi uchun ovoz berdi. Rezolyutsiyani 557 nafar deputatdan 331 nafari qo‘llab-quvvatladi. Bu haqda Euronews xabar berdi.
Ishonchsizlik votumi masalasini dastlab “Yangi xalq fronti” so‘l koalitsiyasi ko‘tardi, so‘ngra byudjet loyihasi bo‘yicha kelishmovchiliklar tufayli o‘ta o‘ng “Milliy birlashma” o‘z tashabbusi bilan chiqdi.
Mishel Barne o‘z nutqida hukumatiga ishonchsizlik bildirilishi “jiddiy oqibatlarga” olib kelishini ta’kidladi. Bosh vazir fransuzlarning “xarid qobiliyati pasayishi” va “yangi politsiyachilar hamda harbiylarni yollash imkoniyati yo‘qolishi” haqida gapirdi.
Endlikda prezident Emmanuel Makron Barne iste’fosini qabul qilishga majbur bo‘ladi, Fransiyani esa yana muvaqqat hukumat boshqaradi. Shu bilan birga, qonun Barneni yangi muddatga qayta saylash imkonini beradi.
Konstitutsiyaga ko‘ra, prezident iyulda o‘tkazilgan so‘nggi saylovlardan bir yil o‘tgandan keyingina navbatdan tashqari yangi parlament saylovlarini tayinlashi mumkin. Bu 1962-yilda Jorj Pompidu hukumati iste’foga chiqarilganidan beri ikkinchi shunga o‘xshash holat hisoblanadi.
Barnening iste’foga chiqishi sababi
Barchasi 2025-yil uchun byudjetni kelishish jarayonida mamlakatdagi siyosiy kuchlar o‘rtasidagi kelishmovchiliklar tufayli boshlangan. Byudjet taqchilligini qisqartirish maqsadida Barne hukumati xarajat moddalarini 40 milliard yevroga qisqartirish, shuningdek, yirik korporatsiyalar va boy fransuzlar uchun soliqlarni oshirishni taklif qilgan — bu xazinaga yana 20 milliard yevro keltirishi kerak edi.
Biroq, uning bir qator takliflariga o‘ta o‘ng “Milliy birlashma” (RN) ishonchsizlik votumi bilan tahdid qilib qarshi chiqdi. Barne bir qator kelishuvlarga erishganiga qaramay, RN qonun loyihasining yakuniy variantini qanoatlantirmadi.
Natijada Barne 2025-yilga mo‘ljallangan ijtimoiy sug‘urta tizimi byudjeti to‘g‘risidagi qonunni hukumat taklif etgan ko‘rinishda, parlamentda muhokama va ovoz berishsiz tasdiqlashga qaror qildi. Bunga Fransiya Konstitutsiyasining 49.3-moddasida ko‘zda tutilgan maxsus tartib huquq beradi.
Biroq, ushbu tartib qo‘llanilganda, Milliy majlis deputatlari hukumatga ishonch masalasini ovozga qo‘yish huquqiga ega bo‘ladi va aynan shunday bo‘ldi ham.
Izoh (0)