Fransiya prezidenti Emmanuel Makron bosh vazir Fransua Bayru bilan uchrashuvda mamlakatning yangi hukumati tarkibini tasdiqladi, bunda asosiy lavozimlar avvalgi vazirlar mahkamasi a’zolarida saqlanib qoldi.
Bu haqda BFMTV telekanali xabar bermoqda.
Ro‘yxatni Yelisey saroyi bosh kotibi Aleksis Koler o‘qib eshittirdi.
Sentyabr oyida TIVga kelgan Jan-Noel Barro lavozimida qoladigan bo‘ldi, Sebastyan Lekornu esa mamlakat Qurolli kuchlari vazirligi rahbari bo‘lishda davom etadi. Shuningdek, Bruno Retayo Ichki ishlar vazirligini boshqarishi bo‘yicha qaror qabul qilindi.
Telekanal taʼkidlaganidek, yangi bosh vazir Fransua Bayru IIV rahbari sifatida Retayoni qoldirishga qaror qilgan bo‘lsa-da, tashqi ishlar va mudofaa vazirini almashtirmoqchi bo‘lgan.
Biroq, diplomatiya va mudofaa - bu prezident an'anaviy tarzda vazirlarni tanlaydigan ikkita soha bo‘lib, Makron ularni joyida qoldirishga qaror qilgan.
5-dekabr kuni Fransiya prezidenti ishonchsizlik votumi tufayli hukumat iste’fosini qabul qilgandi.
Mamlakat bosh vaziri Mishel Barne kabinetiga ishonchsizlik votumi 4-dekabr kuni qabul qilingan edi. Ishonchsizlik votumiga 2025-yilgi byudjetni muvofiqlashtirish jarayonida mamlakat siyosiy kuchlari o‘rtasidagi kelishmovchiliklar sabab bo‘lgan.
Barne kabineti sentyabr oyining ikkinchi yarmida tuzilgan edi. Milliy assambleyaga o‘tkazilgan saylovlardan so‘ng, Makronga yangi hukumat rahbarini tayinlash uchun deyarli uch oy vaqt kerak bo‘ldi. Saylov natijalariga ko‘ra, birorta ham partiya parlamentda ko‘pchilik o‘rinni qo‘lga kirita olmagan edi.
Izoh (0)