“Romeo va Juletta” filmidagi bosh roli bilan mashhur bo‘lgan britaniyalik aktrisa Oliviya Hassi 73 yoshda vafot etdi. Aktrisa ko‘p yillar davomida ko‘krak bezi saratoni bilan kurashib kelayotgan edi.
Oliviya Hassi 1951-yil 17-aprelda Buenos-Ayresda tug‘ilgan. Otasi Andreas Osuna opera xonandasi bo‘lib, Isvaldo Ribo taxallusi bilan sahnaga chiqqan. Onasi — Joy Hassi esa kotiba bo‘lib ishlagan. Qizaloq ikki yoshga to‘lganda, ota-onasi ajrashgan va besh yildan so‘ng, onasi uni ukasi Endryu bilan Londonga olib ketgan. U yerda Oliviya onasining familiyasiga o‘tib, teatr maktabiga qatnay boshlagan.
Hassi 13 yoshida birinchi rolini ijro etgan, 16 yoshida esa italiyalik rejissyor Franko Zeffirellining “Romeo va Juliyetta” filmida Juliyetta rolini ijro etib, “Oltin globus” mukofotiga sazovor bo‘lgan. Oliviyaning filmografiyasida 50 dan ortiq asarlar mavjud, ularning eng mashhurlari — “Nildagi o‘lim”, “Yo‘qotilgan ufq”, “Ayvengo”, “Nosiralik Iso” filmlaridir.
Oliviyaning birinchi turmush o‘rtog‘i aktyor Din Pol Martin bo‘lgan. Ularning o‘g‘li Aleksandr ham aktyorlik kasbini tanlaydi. Hassi 1978-yilda Martin bilan ajrashadi va ikki yildan so‘ng yapon qo‘shiqchisi Akira Fuse bilan rasmiy nikohdan o‘tadi, undan Maksimilian ismli o‘g‘il ko‘radi. 1989-yilda kinoyulduz u bilan ham ajrashib, ikki yildan keyin amerikalik rok qo‘shiqchi va aktyor Devid Glen Aysliga turmushga chiqadi. 1993-yilda ularning oilasida Indiya Joy Aysli ismli qizaloq dunyoga keladi.
Aktrisa ko‘p yillar davomida ko‘krak bezi saratoni bilan kurashib kelayotgan edi. 2008-yilda u kimyoterapiya yoki nurlantirishni rad etib, ikki tomonlama mastektomiya operatsiyasini o‘tkazgan. 2018-yilda yurak va o‘pkasi orasida yana bir o‘sma aniqlanadi. Shundan so‘ng u davolanish uchun nur va kimyoterapiyaga rozi bo‘ladi.
Aktrisaning vafoti haqida uning yaqinlari xabar berdi.
“Chuqur qayg‘u bilan ma’lum qilamizki, Oliviya Hassi 27-dekabr kuni o‘z uyida yaqinlari davrasida vafot etdi. Oliviya ajoyib inson edi, uning samimiy iliqligi, donoligi va mehribonligi uni tanigan barcha odamlarning hayotiga ta’sir qildi. U san’atga bo‘lgan ishtiyoq va sadoqat, ma’naviyat va hayvonlarga bo‘lgan mehr bilan to‘la hayot kechirdi.
Oliviya ortidan sevimli oilasi — farzandlari Aleks, Maks va Indiya, 35 yil birga yashagan turmush o‘rtog‘i Devid Glen Aysli, nabirasi Greyson, hamda qalblarimizda abadiy qoladigan mehr-muhabbat merosini qoldirmoqda. Biz bu o‘rnini to‘ldirib bo‘lmaydigan yo‘qotish tufayli qayg‘urayapmiz, ammo Oliviyaning hayotimiz va sanoatimizga o‘chmas ta’sirini ham e’tirof etamiz. Ushbu og‘ir damlarda fikrlaringiz va duolaringiz uchun minnatdormiz. Haqiqatan ham noyob qalb yo‘qolgani uchun aza tutayotganimizda, maxfiylikni saqlashingizni iltimos qilamiz,
deya yozilgan kino yulduzining ijtimoiy tarmoqdagi shaxsiy sahifasida e’lon qilingan ta’ziyanomada.
Izoh (0)