“Ромео ва Жулетта” фильмидаги бош роли билан машҳур бўлган британиялик актриса Оливия Ҳасси 73 ёшда вафот этди. Актриса кўп йиллар давомида кўкрак бези саратони билан курашиб келаётган эди.
Оливия Ҳасси 1951 йил 17 апрелда Буэнос-Айресда туғилган. Отаси Андреас Осуна опера хонандаси бўлиб, Исвалдо Рибо тахаллуси билан саҳнага чиққан. Онаси — Жой Ҳасси эса котиба бўлиб ишлаган. Қизалоқ икки ёшга тўлганда, ота-онаси ажрашган ва беш йилдан сўнг, онаси уни укаси Эндрю билан Лондонга олиб кетган. У ерда Оливия онасининг фамилиясига ўтиб, театр мактабига қатнай бошлаган.
Ҳасси 13 ёшида биринчи ролини ижро этган, 16 ёшида эса италиялик режиссёр Франко Зеффиреллининг “Ромео ва Жулиетта” фильмида Жулиетта ролини ижро этиб, “Олтин глобус” мукофотига сазовор бўлган. Оливиянинг фильмографиясида 50 дан ортиқ асарлар мавжуд, уларнинг энг машҳурлари — “Нилдаги ўлим”, “Йўқотилган уфқ”, “Айвенго”, “Носиралик Исо” фильмларидир.
Оливиянинг биринчи турмуш ўртоғи актёр Дин Пол Мартин бўлган. Уларнинг ўғли Александр ҳам актёрлик касбини танлайди. Ҳасси 1978 йилда Мартин билан ажрашади ва икки йилдан сўнг япон қўшиқчиси Акира Фусе билан расмий никоҳдан ўтади, ундан Максимилиан исмли ўғил кўради. 1989 йилда киноюлдуз у билан ҳам ажрашиб, икки йилдан кейин америкалик рок қўшиқчи ва актёр Девид Глен Айслига турмушга чиқади. 1993 йилда уларнинг оиласида Индия Жой Айсли исмли қизалоқ дунёга келади.
Актриса кўп йиллар давомида кўкрак бези саратони билан курашиб келаётган эди. 2008 йилда у кимётерапия ёки нурлантиришни рад этиб, икки томонлама мастектомия операциясини ўтказган. 2018 йилда юрак ва ўпкаси орасида яна бир ўсма аниқланади. Шундан сўнг у даволаниш учун нур ва кимётерапияга рози бўлади.
Актрисанинг вафоти ҳақида унинг яқинлари хабар берди.
“Чуқур қайғу билан маълум қиламизки, Оливия Ҳасси 27 декабрь куни ўз уйида яқинлари даврасида вафот этди. Оливия ажойиб инсон эди, унинг самимий илиқлиги, донолиги ва меҳрибонлиги уни таниган барча одамларнинг ҳаётига таъсир қилди. У санъатга бўлган иштиёқ ва садоқат, маънавият ва ҳайвонларга бўлган меҳр билан тўла ҳаёт кечирди.
Оливия ортидан севимли оиласи — фарзандлари Алекс, Макс ва Индия, 35 йил бирга яшаган турмуш ўртоғи Девид Глен Айсли, набираси Грэйсон, ҳамда қалбларимизда абадий қоладиган меҳр-муҳаббат меросини қолдирмоқда. Биз бу ўрнини тўлдириб бўлмайдиган йўқотиш туфайли қайғураяпмиз, аммо Оливиянинг ҳаётимиз ва саноатимизга ўчмас таъсирини ҳам эътироф этамиз. Ушбу оғир дамларда фикрларингиз ва дуоларингиз учун миннатдормиз. Ҳақиқатан ҳам ноёб қалб йўқолгани учун аза тутаётганимизда, махфийликни сақлашингизни илтимос қиламиз,
дея ёзилган кино юлдузининг ижтимоий тармоқдаги шахсий саҳифасида эълон қилинган таъзияномада.
Изоҳ (0)