1 mln 350 ming rubl naqd xorijiy valyutani yashirincha olib chiqishga bo‘lgan urinish fosh etildi. Bu haqda Toshkent viloyati bojxona boshqarmasi xabar berdi.
Maʼlum qilinishicha, “Farhod” chegara bojxona posti orqali qo‘shni davlatga chiqib ketayotgan yo‘lovchi bojxona nazoratidan o‘tayotgan vaqtida o‘z xatti-harakatlari bilan bojxona xodimlarining eʼtiborini tortgan. Yo‘lovchi belgilangan tartibda shaxsiy ko‘rikdan o‘tkazilgan.
Natijada kurtkasining yengidagi cho‘ntaklaridan og‘zaki so‘rovda maʼlum qilinmagan hamda deklaratsiyalanmagan, 1 mln 350 ming rubl naqd xorijiy valyutasi borligi aniqlandi.
Hozirda ushbu holat yuzasidan surishtiruv harakatlari olib borilmoqda.
2022-yil noyabrda esa Samarqand viloyati Paxtachi tumanida 999,9 probali sof oltinni sotmoqchi bo‘lgan shaxslar ushlangandi. Shuningdek, Bulung‘ur tumanida oltin bo‘laklarini noqonuniy olib ketayotgan fuqaro qo‘lga olingan edi.
2023-yilning iyul oyida DXXning Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda o‘tkazilgan tezkor tadbirda yoqutni 300 ming dollarga sotmoqchi bo‘lganlar ushlangan.
Shuningdek, sentyabr oyida Toshkent viloyatida 5 mln rublni xorijga noqonuniy olib chiqishga uringan shaxs to‘xtatib qolindi.
Maʼlumot uchun, amaldagi tartiblarga ko‘ra jismoniy shaxslarga ekvivalenti 100 mln so‘mga teng yoki undan oshmaydigan miqdordagi naqd valyuta mablag‘larini O‘zbekistondan tashqariga bojxona nazorati qoidalariga rioya etilgan holda cheklovlarsiz olib chiqishlariga ruxsat etiladi.
Izoh (0)