1 млн 350 минг рубль нақд хорижий валютани яширинча олиб чиқишга бўлган уриниш фош этилди. Бу ҳақда Тошкент вилояти божхона бошқармаси хабар берди.
Маълум қилинишича, “Фарҳод” чегара божхона пости орқали қўшни давлатга чиқиб кетаётган йўловчи божхона назоратидан ўтаётган вақтида ўз хатти-ҳаракатлари билан божхона ходимларининг эътиборини тортган. Йўловчи белгиланган тартибда шахсий кўрикдан ўтказилган.
Натижада курткасининг енгидаги чўнтакларидан оғзаки сўровда маълум қилинмаган ҳамда декларацияланмаган, 1 млн 350 минг рубль нақд хорижий валютаси борлиги аниқланди.
Ҳозирда ушбу ҳолат юзасидан суриштирув ҳаракатлари олиб борилмоқда.
2022 йил ноябрда эса Самарқанд вилояти Пахтачи туманида 999,9 пробали соф олтинни сотмоқчи бўлган шахслар ушланганди. Шунингдек, Булунғур туманида олтин бўлакларини ноқонуний олиб кетаётган фуқаро қўлга олинган эди.
2023 йилнинг июль ойида ДХХнинг Тошкент шаҳар бўйича бошқармаси ходимлари томонидан Иқтисодий жиноятларга қарши курашиш департаменти билан ҳамкорликда ўтказилган тезкор тадбирда ёқутни 300 минг долларга сотмоқчи бўлганлар ушланган.
Шунингдек, сентябрь ойида Тошкент вилоятида 5 млн рублни хорижга ноқонуний олиб чиқишга уринган шахс тўхтатиб қолинди.
Маълумот учун, амалдаги тартибларга кўра жисмоний шахсларга эквиваленти 100 млн сўмга тенг ёки ундан ошмайдиган миқдордаги нақд валюта маблағларини Ўзбекистондан ташқарига божхона назорати қоидаларига риоя этилган ҳолда чекловларсиз олиб чиқишларига рухсат этилади.
Изоҳ (0)