Moskvada mehnat muhojirlarini emlash ishlari boshlandi. 27-iyundan ular Saxarovo qishlog‘idagi migratsiya markazida, 29-iyundan esa “Sadovod” savdo markazi yonidagi vaksinatsiya punktida emlanmoqda. Rossiya fuqaroligiga ega bo‘lmagan kishilarni emlash qanday ketayotgani haqida “RBK” fotoreportaj tayyorladi.
Moskvada mehnat muhojirlarini emlash hozircha tajriba rejimida boshlandi. Shaharda ayrim toifadagi soha xodimlarining kamida 60 foizni emlash majburiy qilingan. Ushbu sohalarga umumiy ovqatlanish, savdo, transport, uy-joy kommunal xizmatlari va boshqalar kiradi. Ish beruvchilarning so‘roviga binoan xodimlar bir komponentli “Sputnik Layt” vaksinasi bilan emlanmoqda.
Majburiy emlash mehnat muhojirlarining aksariyatini o‘z ichiga olgan qurilish sanoatiga taalluqli emas. Koronavirus pandemiyasi va shu bilan bog‘liq chegaralarning yopilishi tufayli ko‘plab mehnat muhojirlari 2020-yilda Rossiyani tark etgan, shuning uchun o‘tgan yilning kuziga kelib qurilish maydonlarida va uy-joy sohasida ishchilar yetishmay qoldi.
Bosh vazirning qurilish sohasini nazorat qiluvchi o‘rinbosari Marat Xusnullinning aytishicha, hukumat Rossiyaga mehnat muhojirlarini olib kirish tartibini qanday soddalashtirishni ko‘rib chiqmoqda. Shu munosabat bilan chet elliklarni majburiy emlash ham muhokamadan o‘tgan. “Agar siz Rossiyaga ishlashga kelsangiz, biz sizni emlashga tayyormiz. Biz bu haqda amalda ichki kelishuvga erishdik, endi ishni yangi reglament shaklida tashkil etishga harakat qilyapmiz”, — dedi Xusnullin.
Rossiyadagi chet ellik ishchilarni emlash pullik. Vaksinatsiya xarajatlarini ish beruvchi to‘laydi, shuningdek, u xodimning emlanganlik guvohnomasini oladi. Bir xodimni emlash narxi 1300 rubl (190 ming so‘m)ni tashkil qiladi.
Mavzuga doir: 1,5 mln dollarlik mukofot, bepul pitssa va tovuq. Jahonda COVID-19’ga qarshi emlanganlar qanday rag‘batlantirilmoqda?
Migrantlarning ro‘yxatlari Moskva meriyasiga taqdim etiladi. Ularda xodimning pasport ma’lumotlari, uning patenti, yashash guvohnomasi yoki Rossiyada vaqtincha qolish uchun ruxsatnoma bo‘lishi kerak. Armaniston, Belarus, Qozog‘iston va Qirg‘iziston fuqarolari uchun (Bojxona ittifoqiga kiritilgan) faqat pasport ma’lumotlarini taqdim etish kifoya. Ro‘yxat topshirilgandan so‘ng vakolatli organlar emlash sanasi va vaqtini belgilaydi.
Mehnat muhojirlari uchun Saxarovodagi vaksinatsiya punkti soat 09:00 dan 21:00 gacha, “Sadovod” savdo markazi yonidagisi esa, soat 08:00 dan 20:00 gacha ishlaydi. Shu bilan birga shahar meriyasi xabariga ko‘ra, Saxarovodagi emlash punkti ochilgan paytda faqat ikki shifokor va 12 nafar hamshira ishlay boshlagan. “Sadovod” yaqinidagi emlash markazida uch shifokor va 16 nafar hamshira mavjud.
Tajriba rejimida mehnat muhojirlarini emlash tugagandan so‘ng, majburiy vaksinatsiya boshqa xorijiy guruhlarga, shu jumladan o‘z-o‘zini ish bilan ta’minlaydiganlarga ham qo‘llaniladi.
Ichki ishlar vazirligining ma’lumotlariga ko‘ra, 2021-yil yanvaridan may oyigacha 538,7 ming nafar chet elliklarga va Rossiya fuqaroligiga ega bo‘lmagan kishilarga Rossiyada ishlash uchun patent berilgan. 2020- yil xuddi shu davrda 585 ming kishi patent olgan edi.
“Sputnik Layt” vaksinasi 26-iyundan boshlab fuqarolik muomalasiga kirdi, Sog‘liqni saqlash vazirligi rahbari Mixail Murashkoning so‘zlariga ko‘ra, iyul oxirigacha preparatning 2,5 million dozasi vaksinatsiya uchun taqdim etiladi. Hukumat allaqachon 500 ming dozani sotib olgan, bu preparatdan qayta emlash uchun ham foydalanish mumkin.
Ba’zi kompaniyalar o‘z xodimlari uchun vaksinatsiyani mustaqil ravishda tashkil etishga qaror qildi. “Sitimobil” taksi xizmati xabariga ko‘ra, kompaniya qo‘shimcha vaksinatsiya punktlarini tashkil qiladi va Rossiya fuqarolariga tegishli bo‘lmagan, ammo taksida ishlay oladigan haydovchilar uchun vaksinalar sotib oladi.
Yandex taksi xizmati kompaniyalari 23-iyun kuni “Yandeks Go”, “Yandeks Yeda”, “Yandeks market” “Yandeks dostavka”, “Yandeks lavka” servislarida ishlovchi haydovchilar va kuryerlar uchun emlash punktlarini ochdi. Xodimlar “Sputnik V” ikki komponentli vaksina bilan bepul emlanadi. Shuningdek, kompaniya koronavirusga qarshi emlangan xodimlarni rag‘batlantirishga qaror qildi. Masalan, emlangan taksichilar yangi buyurtmalarni boshqalarga qaraganda ertaroq qabul qilishi mumkin, emlangan kuryerlar o‘ziga qulay ish smenasi va yetkazib berish joylarini tanlashi mumkin.
Izoh (0)