Rossiyalik reper Morgenshtern Instagram sahifasi orqali o‘tkazilgan tanlovda Mercedes avtomobilini yutib olgan buxorolik 20 yoshli Azim Abdullayevga avtomobilni topshirish uchun Buxoro shahriga keldi. Yuzlab odamlar ishtirok etgan tantanali marosim shahardagi restoranlardan biri oldida bo‘lib o‘tdi.
Morgenshtern va uning jamoasi buxoroliklarning qiyqiriqlari ostida Azim Abdullayevga afsonaviy “Merin”ning kalitini topshirdi. So‘ng ularga zarbof to‘nlar kiydirilib, milliy taomlar bilan mehmon qilindi.
9-dekabr kuni Azim Abdullayev Instagram’dagi sahifasi orqali Morgenshtern tez kunda O‘zbekistonga kelib, unga Mercedes’ni topshirishini ma’lum qilgan edi.
Eslatib o‘tamiz, rossiyalik taniqli reper va bastakor Alisher Valiyev (taxallusi Morgenshtern) 18-oktabr kuni Instagram’da Mercedes-Benz E200 mashinasi uchun tanlov o‘tkazgan va unda Buxoroda yashovchi @aza_1002 akkaunti egasi Azim Abdullayev g‘alaba qozongan edi.
Morgenshtern o‘shanda g‘olib bilan bog‘langan va avtomobilni shaxsan o‘zi O‘zbekistonga olib kelishini ma’lum qilgan. Keyinroq musiqachi O‘zbekistonda xorijda ishlab chiqarilgan mashina uchun belgilangan bojxona to‘lovlari miqdoridan xabar topgach o‘z stories’ida videoxabar qoldirgan.
“O‘zbekistonda mashina uchun bojxona to‘lovi qancha ekanini bilasizmi? Uning narxi mashina narxiga teng ekan”, — degan Morgenshtern. Reper chegaralar yopiqligi va mashinani mamlakatga olib kirish qimmatligi sababli uni yetkazib berishda hukumatdan yordam so‘ragan.
Musiqachi bloger Yuriy Dudga bergan intervyusida Mercedes-Benz’ni tanlov g‘olibiga yetkazib berish uchun yana 2 million rubl to‘lashi kerakligini aytgan.
Mercedes-Benz’ning yana bir xalqona nomi “Merin”, qo‘shiqchi o‘z kompozitsiyalaridan birini ushbu mashinaga bag‘ishlagan (unda haqoratli so‘zlardan ko‘p foydalanilgan), qo‘shiq Youtube’da 85 million martadan ko‘proq ko‘rilgan. Hisob-kitoblarga ko‘ra, Morgenshtern mashina uchun 4 million rubl (taxminan 51 ming AQSh dollari) sarflagan.
Davlat bojxona qo‘mitasining hisob-kitoblariga ko‘ra, reperning mashinasini O‘zbekistonga olib kelish uchun to‘lanishi kerak bo‘lgan boj to‘lovi 353 801 986,83 so‘mni tashkil etgan.
Morgenshtern haqida
Alisher Valiyev (Morgenshtern taxallusi nemis tilidan tarjima qilinganda “tonggi yulduz”) rep aytishni 12 yoshida boshlagan, yuqori sinfda o‘qib yurgan vaqtlarida “qora alkogolizm” yillarini o‘tkazib, mashhur bo‘lgan, dunyo tan olgan rep-yulduzlarining hayoti haqida replar aytgan. Ufada yashovchi 22 yoshli musiqachi Z avlodi havas qiladigan xonandaga aylangan va Instagram’dagi to‘g‘ridan to‘g‘ri efirda oddiy, sodda treklarini ijro etib, millionlab daromad qilmoqda, deyiladi Forbes ma’lumotida.Morgenshtern boshqalar ijro etgan qo‘shiqlar bilan tanilgan: 2018-yilda u “IziRep” turkumidagi videolarni tayyorladi va ularda taniqli ijrochilarning ommalashgan qo‘shiqlarini jamladi (Eljey, Kizaru va Face), shuningdek, ushbu sodda replarni boshqa har qanday odam ijro qilishi mumkinligini tushuntirdi.
Jurnalist Nikolay Redkinning Meduza e’lon qilgan maqolasida Alisherning boshqalar tomonidan o‘ziga yo‘llagan salbiy fikrlardan ustalik bilan foydalanishi va YouTube’da reaksiyalar yaxshi baholanishini anglagan holda to‘g‘ri harakatlar qilganini e’tirof qilgan. 2018-yilda reper o‘zining birinchi albomini taqdim qildi, Rossiya bo‘ylab turga chiqdi va 100 ming rubllik kamerani yoqib yubordi. Keyinroq ushbu harakatiga izoh berib, bu odamlar diqqatini tortishni tezkor va yengil usuli ekanini qayd etdi: ommalashgan blogerning ishlab topayotgan pullari, muhokama qilinayotganidek, u qadar ko‘p emas.
2019-yil oxirida u to‘g‘ridan to‘g‘ri efirda qo‘shiqlar albomini yozishini e’lon qildi va har bir studiya sessiyasini jonli tarzda ijtimoiy tarmoqqa joylashtirib bordi. Yakunda hosil bo‘lgan relizga “Afsonaviy chang” deb nom berdi (2020-yil yanvarida sotuvga chiqqan) uni barcha striming servislarida 500 million martadan ko‘p eshitishgan (ushbu raqam sentabr oyi holatiga olingan), albomning har bir treki “platinali” disk darajasiga chiqdi. Morgenshtern qo‘shiqlarida haqoratli so‘zlar, so‘kinishlar ko‘p uchraydi.
Mavzuga doir:
- Rossiyalik reper Morgenshtern buxorolik Azim Abdullayevga Mercedes’ini topshirish uchun O‘zbekistonga keldi (video)
- “‘Rastamojka’ mashina narxidek ekan”. Rossiyalik reper o‘z Mercedes’ini buxorolik yigitga sovg‘a qilish uchun O‘zbekistonga kelmoqchi
- Rossiyalik reper Morgenshtern buxorolik yigitga sovg‘a qilgan Mercedes’ni O‘zbekistonga olib kirishi uchun qancha bojxona boji to‘lashi hisoblab chiqildi
Izoh (0)