DXXning Toshkent shahar bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda o‘tkazilgan tezkor tadbirda yoqutni 300 ming dollarga sotmoqchi bo‘lganlar ushlandi.
.jpg)
O‘zAning ma’lum qilishicha, 1968-yilga tug‘ilgan ayol sof og‘irligi 838 gramm bo‘lgan yoqut qimmatbaho toshni 300 ming dollarga sotishga kelishib, ushbu summadan 80 ming dollarni olgan vaqtida ashyoviy dalillar bilan ushlangan.
Tezkor surishtiruv harakatlari davomida, u mazkur qimmatbaho toshni 1960-yilda tug‘ilgan erkakdan olgani aniqlanib, ko‘rilgan chora-tadbirlar natijasida u ham ushlangan. Har ikki fuqaro ham muqaddam firibgarlik bilan bog‘liq jinoyatlari uchun sudlangan bo‘lsa-da, o‘z xatolaridan to‘g‘ri xulosa chiqarmagan.
Mutaxassislarning baholashicha, ushbu qimmatbaho toshning narxi 477 million 256 ming so‘mni tashkil etadi.
Boshqa holatda esa DXXning Navoiy va Samarqand viloyatlari bo‘yicha boshqarmalari xodimlari tomonidan Bosh prokuratura huzuridagi departamentning hududiy boshqarmasi bilan hamkorlikda Bulung‘ur tumanidagi “Yuqori nuqta” YPX maskanida tezkor tadbir o‘tkazildi.
Unda Toshkent shahri tomon harakatlanayotgan, Xatirchi tumanida yashovchi, 1983-yilda tug‘ilgan fuqaro boshqaruvidagi Nexia to‘xtatilib, ko‘zdan kechirilganda, uning salonida umumiy og‘irligi 1 kilo 75 gramm bo‘lgan 11 dona bo‘lakdagi oltin borligi aniqlanib, protsessual tartibda rasmiylashtirgan.
Mutaxassislarning baholashicha, ushbu 999 probali oltinning qiymati 795 million so‘mni tashkil etadi.
Hozirda har ikki holat yuzasidan mazkur shaxslarga va boshqalarga nisbatan Jinoyat kodeksining 177-moddasi (valyuta qimmatliklarini qonunga xilof ravishda olish yoki o‘tkazish) 4-qismi “a” bandi bilan jinoyat ishlari qo‘zg‘atilib, tergov harakatlari olib borilmoqda.
Izoh (0)