Madridning “Real” klubi Qit’alararo Kubok—2024 finalida “Pachuka”ni 3:0 hisobida mag‘lub etdi. Shu tariqa, Karlo Anchelotti “Real”ni boshqaruvidagi 15-sovrinini qo‘lga kiritdi va klub tarixidagi eng muvaffaqiyatli murabbiyga aylandi.
“Real” bilan 15 sovrin — bu aql bovar qilmaydigan natija! Bu muvaffaqiyatdan chin dildan xursandman va faxrlanaman. Uchrashuv oson kechmadi: kutilmagan raqib, hafta o‘rtasidagi o‘yin... Bu g‘alaba — sinovlar va jarohatlarga boy bo‘lgan, fantastik, ammo oson kechmagan yilning eng yuqori cho‘qqisida ro‘y berdi. 2024-yilni shu tarzda yakunlashdan yaxshiroq yo‘l yo‘q! Biz 2025-yilni qanday qilib yanada yorqinroq qilish haqida o‘ylayapmiz”, deya Anchelotti so‘zlarini keltiradi Ispaniyaning AS nashri.
Ma’lumot uchun, Karlo Anchelotti 2021-yildan beri “Real” boshqarib keladi. Birinchi marta u jamoani 2013-yildan 2015-yilgacha boshqargan. Bu vaqt ichida italiyalik mutaxassis uch marta Chempionlar Ligasida zafar quchgan va ikki marta Ispaniya chempioniga aylangan. Bundan tashqari, Anchelotti ikki bor Ispaniya Kubogi, ikki bor Ispaniya Superkubogi, uch bor UEFA Superkubogi, bir marta Qit'alararo kubok va Klublar o‘rtasidagi Jahon chempionatida g‘oliblikni qo‘lga kiritgan.
Izoh (0)