Rossiya va AQSH prezidentlari Vladimir Putin va Donald Trampning yuzma-yuz muzokaralari o‘tkazilishi kutilayotgan Alyaskada hamon ulkan rus merosi saqlanib qolmoqda. Bu haqda shtatning sobiq vitse-gubernatori Loren Leman ma’lum qildi.
“Bu yerda hamon til, din va madaniyatda ulkan rus merosi saqlanib qolgan. Men Alyaskada rus ildizlariga ega 700 dan ortiq nomni bilaman”, dedi sobiq amaldor.
Lemanning aytishicha, uning otasi 1917-yilda Kenay yarimorolidagi Ninilchik qishlog‘ida tug‘ilgan. O‘sha paytga kelib Rossiya imperiyasi Shimoliy Amerikadagi mulklarini AQShga sotganiga 50 yil bo‘lgan edi. Shunday bo‘lsa-da, bolalarning ona tili ingliz tili emas, balki rus tili bo‘lgan.
“Ninilchik 1847-yilda, Alyaskaning sotilishidan 20 yil avval, rus-amerika mustamlakasida ishlagan kishilar uchun aholi manzilgohi sifatida barpo etilgan. Ular u yerda oila qurishni, baliq ovlashni, ov qilishni, sabzavot yetishtirish bilan shug‘ullanishni istashgan. Bu esa bunday faoliyatlar uchun juda qulay joy edi” deya ta’kidladi Leman.
Putin va Trampning Alyaskadagi uchrashuvi 15-avgust kuniga rejalashtirilgan. Kreml muzokaralar vaqti va joyini allaqachon tasdiqlagan. Muhokamaning asosiy mavzusi Ukrainadagi mojaroni hal etish bo‘lishi kutilmoqda.
12-avgust kuni Amerika rahbari Rossiya prezidenti bilan bo‘ladigan muzokaralardan kutayotgan natijalari haqida fikr bildirdi. Tramp Ukrainada o‘t ochishni to‘xtatishga erishish niyatida ekanligini ma’lum qildi va Moskva bilan Kiyev o‘rtasida hududlarni almashish imkoniyatini istisno etmadi.
Izoh (0)