Futbol bo‘yicha Ispaniya Kubogi nimchorak finalida “Real” va “Atletiko” o‘zaro to‘qnash keldi.
“Atletiko” qo‘shimcha bo‘limlarda urilgan gollar evaziga (4:2) g‘alabani ilib ketdi.
Shu tariqa “Real”ning 21 o‘yinlik mag‘lubiyatsiz seriyasi o‘z nihoyasiga yetdi. Shu vaqtga qadar “qaymoqranglilar” 18 ta g‘alaba va 3 ta durang qayd etgan.
Qayd etib o‘tish joiz, “Real” o‘tgan yili kuzda Madrid derbisida aynan “Atletiko”ga mag‘lub bo‘lgandi.
4-fevral kuni jamoalar La Liga doirasida yana bir bor to‘qnash keladi. Uchrashuv “Santiago Bernabeu”da bo‘lib o‘tadi.
Karlo Anchelotti jamoasi joriy yilda ham treblga erishish imkoniyatini qo‘ldan chiqardi. Eslatib o‘tamiz, bir mavsumda mamlakat chempionati, Kubogi va Chempionlar Ligasida g‘olib bo‘lgan jamoa trebl sohibi degan nomga sazovor bo‘ladi.
“Madrid” o‘z tarixida hech qachon trebl qayd etmagan. “Bavariya” (ikki marta), “Barselona” (ikki marta), “Inter”, “Manchester Yunayted”, “Manchester Siti”, “Seltik”, “Ayaks” va “PSV” treblga erishgan.
Izoh (0)