Rekord darajadagi issiq Ispaniya va Portugaliyada yirik yong‘inlar chiqishiga sabab bo‘ldi. Bu haqda BBC nashri xabar berdi.
Manbalarga ko‘ra, ikki mamlakatda kuchli o‘rmon yong‘inlari boshlangan. Yevropada rekord darajadagi issiq to‘lqini davom etmoqda va bu yong‘inlarning tez tarqalishiga olib kelmoqda.
Ispaniya va Portugaliyadagi o‘ta yuqori harorat kamida 13-avgustgacha saqlanadi. Havo harorati +44°C gacha yetishi kutilmoqda. Qayd etilishicha, yong‘inlar allaqachon 1000 gektardan ortiq hududni qamrab olgan.
Reuters agentligining yozishicha, o‘t o‘chiruvchilar Ispaniya poytaxti Madrid yaqinidagi alangani nazorat ostiga olishgan. Yong‘in oqibatida bir kishi halok bo‘ldi: tanasining 98 foizi kuygan erkak shifoxonaga yotqizilgan, biroq uning hayotini saqlab qolishning imkoni bo‘lmagan. Shuningdek, yong‘in hududidan 180 nafar odam evakuatsiya qilindi.
Olimlarning aytishicha, O‘rta Yer dengizi mintaqasida tobora issiq va quruq havo kuzatilmoqda. Bu esa o‘rmon yong‘inlari xavfini oshirmoqda. Quruq o‘simliklar va kuchli shamol olovning tez tarqalishiga hamda nazorat qilib bo‘lmaydigan yong‘inlarga sabab bo‘ladi. Ba’zan olov bo‘ronlarini ham yuzaga keltiradi.
So‘nggi tadqiqotlar shuni ko‘rsatdiki, global iqlim o‘zgarishi sababli issiq havodan o‘lim darajasi uch barobarga oshgan.
Izoh (0)