“Halol mehnatingiz va shijoatingiz uchun katta rahmat” — Shavkat Mirziyoyev qishloq xo‘jaligi xodimlarini tabrikladi

Shavkat Mirziyoyev 8-dekabr kuni qishloq xo‘jaligi xodimlarini kasb bayrami bilan tabrikladi. Tabrik matni Prezident matbuot xizmati tomonidan e’lon qilindi.

“Fidokorona mehnati bilan tuproqdan noz-ne’mat undirib, xalqimiz dasturxonini to‘kin qilib kelayotgan sizdek mirishkor dehqon va fermerlar, mohir bog‘bon va chorvadorlarga, omilkor agronom va mexanizatorlar, klasterlarning tajribali rahbarlari va xodimlari, sohaning hurmatli faxriylariga o‘zimning chuqur hurmat-ehtirom va ezgu tilaklarimni bildiraman”, deyiladi tabrikda.

So‘nggi yillarda global iqlim o‘zgarishlari, tabiiy ofatlar, yer va suv resurslari taqchilligi qishloq xo‘jaligi sohasida ham jiddiy muammolarni keltirib chiqarmoqda. Davlat rahbarining ta’kidlashicha, shunday murakkab sharoitga qaramasdan, 2024-yilda qishloq xo‘jaligi xodimlari mehnati bilan O‘zbekistonda 9 million tonna don, 3 million tonnadan ortiq paxta, 16 million tonnadan ziyod sabzavot va poliz, 5 million tonna meva va uzum, 4 million tonna kartoshka, 15 million tonnadan ko‘p go‘sht va sut, 30 ming tonna pilla yetishtirildi.

Davlat rahbari buni chinakam qahramonlik namunasi, deb atadi. “Buning uchun sizlarning sha’ningizga har qancha tahsin va tasannolar aytsak, arziydi”, deyiladi prezident tabrigida.

Qayd etilishicha, bunday yutuqlarga erishishda keyingi yillarda qishloq xo‘jaligi rivojiga berilayotgan e’tibor, tarmoqda tarkibiy o‘zgarishlar amalga oshirilib, ishlab chiqarish munosabatlari zamon talablari asosida yo‘lga qo‘yilayotgani hal qiluvchi ahamiyatga ega bo‘ldi.

G‘allachilikda resurs tejaydigan zamonaviy agrotexnologiyalarni qo‘llash natijasida o‘rtacha hosildorlik birinchi marta 85 sentnerga yetkazildi. Resurslarni tejaydigan intensiv texnologiyalar asosida 50 ming gektar maydonda sabzavot yetishtirilib, hosildorlik an’anaviy usulga nisbatan 200-250 sentnerga oshdi, sof daromad gektaridan 6-8 ming dollarni tashkil etdi.

Yil davomida qishloq xo‘jaligi subyektlariga 18 trillion so‘m imtiyozli kredit va 176 milliard so‘m subsidiya ajratilgani, umumiy qiymati 3,6 trillion so‘mlik 11 ming 600 dona yuqori unumli zamonaviy texnika va agregatlar yetkazib berildi

O‘zbekistonda qishloq xo‘jaligini iqlim o‘zgarishlariga moslashtirish, ularning salbiy ta’sirini yumshatish maqsadida ilk bor Milliy dastur qabul qilindi. Uning ijrosini ta’minlash hamda mahsulot yetishtiruvchilarni qo‘llab-quvvatlash uchun xorijiy moliya tashkilotlaridan 160 million dollardan ortiq mablag‘lar jalb etilmoqda.

Shuningdek, dehqon xo‘jaliklarini tashkil etish uchun 75 ming gektar yer maydonlari 180 ming nafardan ortiq ijtimoiy muhtoj aholi hamda yoshlarga bo‘lib berilgani va 200 mingdan ziyod ish o‘rni yaratilgani qishloqda bandlikni ta’minlash, real daromadlarni oshirish, kambag‘allikni qisqartirishda muhim rol o‘ynamoqda.

Tomorqachilikda daromadni oshirish maqsadida 5145 ta mahalla “Bir mahalla – bir mahsulot” tamoyili asosida ixtisoslashtirildi.

Chorva naslini yaxshilash va mahsulot hajmini ko‘paytirish uchun aholiga 40 ming bosh qoramol, 82 mingta qo‘y va echki yetkazib berildi, chetdan 260 ming bosh zotdor mollar olib kelindi.

Qishloq va mahallalarni obod qilish, ijtimoiy infratuzilmalarni rivojlantirish, qishloq ahli uchun yangi ish o‘rinlari yaratish borasidagi ishlar ham izchil davom ettiriladi.

“Halol mehnatingiz, azmu shijoatingiz uchun yana bir bor katta rahmat. Doimo sog‘-omon bo‘ling, umringizdan baraka toping, qadrdonlarim!”, deyiladi tabrikda.

O‘zbekistonda har yili dekabrning ikkinchi yakshanbasida “Qishloq xo‘jaligi xodimlari” kuni nishonlanadi.