Мадриднинг “Реал” клуби Қитъалараро Кубок—2024 финалида “Пачука”ни 3:0 ҳисобида мағлуб этди. Шу тариқа, Карло Анчелотти “Реал”ни бошқарувидаги 15-совринини қўлга киритди ва клуб тарихидаги энг муваффақиятли мураббийга айланди.
“Реал” билан 15 соврин — бу ақл бовар қилмайдиган натижа! Бу муваффақиятдан чин дилдан хурсандман ва фахрланаман. Учрашув осон кечмади: кутилмаган рақиб, ҳафта ўртасидаги ўйин... Бу ғалаба — синовлар ва жароҳатларга бой бўлган, фантастик, аммо осон кечмаган йилнинг энг юқори чўққисида рўй берди. 2024 йилни шу тарзда якунлашдан яхшироқ йўл йўқ! Биз 2025 йилни қандай қилиб янада ёрқинроқ қилиш ҳақида ўйлаяпмиз”, дея Анчелотти сўзларини келтиради Испаниянинг АС нашри.
Маълумот учун, Карло Анчелотти 2021 йилдан бери “Реал” бошқариб келади. Биринчи марта у жамоани 2013 йилдан 2015 йилгача бошқарган. Бу вақт ичида италиялик мутахассис уч марта Чемпионлар Лигасида зафар қучган ва икки марта Испания чемпионига айланган. Бундан ташқари, Анчелотти икки бор Испания Кубоги, икки бор Испания Суперкубоги, уч бор УЕФА Суперкубоги, бир марта Қитъалараро кубок ва Клублар ўртасидаги Жаҳон чемпионатида ғолибликни қўлга киритган.
Изоҳ (0)